Anamorava përfaqësohet nga shumë deputet, qyteti i Gjilanit, tani në Kuvendin e Kosovës, ka shtatë anëtarë, por që qytetarët nuk janë të kënaqur nga përfaqësuesit e tyre, të cilët janë përzgjedhur me votën e gjilanasve shkruan Radio Star.
Profesori universitar, Refik Ramadani, thotë se deputetët gjilanas, nuk po i adresojnë problemet e qytetit, ata po merren me polemika politike dhe me debatet partiake dhe ato nuk po i sjellin asnjë të mirë anamoravës.
Shkrimi i plotë:
Ku janë deputetët “ANONIM” të Gjilanit dhe Anamoravës?
Deputetët e rajonit të Gjilanit dhe Anamoravës janë zgjedhur me besimin e qytetarëve për të përfaqësuar dhe adresuar problemet e tyre në Kuvendin e Kosovës. Megjithatë, shumica prej tyre kanë dështuar në përmbushjen e kësaj detyre thelbësore, sidomos deputetët e Vetëvendosjes. Në vend që t’i japin zë qytetarëve të tyre dhe të trajtojnë çështjet që kanë ndikim të drejtpërdrejtë në jetën e qytetarëve të Gjilanit, disa deputetë kanë përqendruar vëmendjen e tyre në çështje të tjera që nuk janë prioritare për Gjilanin.
Për shembull, shumë prej tyre janë përfshirë në polemika politike dhe debate partiake që nuk sjellin asnjë përparim konkret për qytetarët e Anamoravës. Në vend të fokusimit në problemet reale, ata preferojnë të përdorin kohën dhe energjinë për luftime të panevojshme politike, duke lënë mënjanë çështjet e rëndësishme që presin zgjidhje. Shumica prej tyre, vetëm heshtin, e atje kanë shkuar për të folur.
Gjithashtu, shqetësuese është edhe mungesa e prezencës së tyre aktive në Gjilan, me shtresa të ndryshme të shoqërisë. Përfaqësuesit tanë duhet të jenë të pranishëm në terren, të dëgjojnë nevojat dhe shqetësimet e qytetarëve dhe të punojnë në bashkëpunim me ta për të gjetur zgjidhje. Megjithatë, deputetët e Anamoravës janë larguar nga kjo përgjegjësi dhe nuk kanë qenë të disponueshëm për komunikim me qytetarët tanë.
Nëse deputetët e rajonit të Gjilanit dhe Anamoravës nuk e kuptojnë rëndësinë e përfaqësimit të përgjegjshëm dhe efektiv të qytetarëve të tyre në Kuvendin e Kosovës, ata po bëjnë shërbim të dobët për rajonin prej nga vijnë, pavarësisht se Kosova është një Zonë Zgjedhore. Votat, kryesisht i marrin në Gjilan dhe Anamoravë. Është e rëndësishme që ata të kthejnë fokusin te nevojat reale të qytetarëve dhe të angazhohen me vendosmëri për të adresuar problemet që kanë një impakt të drejtpërdrejtë në jetën e tyre.
Qytetarët e Gjilanit dhe Anamoravës kanë nevojë për përfaqësues të përkushtuar dhe të motivuar, që t’i japin zë shqetësimeve të tyre në Kuvend dhe të punojnë në përputhje me interesat e qytetarëve si votues. Është koha që deputetët të rikthejnë përgjegjësinë e tyre ndaj qytetarëve dhe të ndërmerren hapa konkrete për të adresuar problemet e tyre në nivel kombëtar./radiostar/
