Kryeministri Albin Kurti ka thënë para deputetëve se termi ‘fqinjësi e mirë’ bashkë me nenin 1 dhe 4 të propozimit evropian garantojnë njohjen de fakto nga Serbia.
“Besoj është e rëndësishem të përmendet qe shprehja ‘fqinjësia e mirë’ përdoret për herë të parë në marrëveshje dhe kjo është shumë e rëndësishme, se fqinjësia e mirë i bie secili në shpi të vet. Pra nuk ka fqinjësi pa dy shtëpi. Përveç kësaj neni 1 dhe neni 4 i marrëveshjes bazike së bashku me konceptin e fqinjësisë së mirë e formojnë njohjen de-fakto. Unë nuk besoj që mund të gjeni një jurist të mirë vendor apo ndërkombëtar që nuk e konfirmon këtë gjë”, ka deklaruar ai.
Duke folur për 6 kushtet që i kishte vënë në mënyrë që ta themelojë Asociacionin, ai ka thënë se ato vlejnë ende.
“Çka kam thënë për Asociacionin e ato 6 kushtet, parimet, gjithçka vlen. Por po e ritheksoj që nuk kam ndryshu as në koncept, as në qëllim e as në kuptim. Ajo çfarë kam dashur të bëj jo sot, jo prejse jam bërë kryeministër po prej 2010 kur kam garuar për herë të parë që të bëhem deputet, është të pranoj pjesërisht atë që është trashëguar në aspektin legal-juridik dhe strategjikisht të përpiqem të bëj maksimumin për ndryshimin e saj. Pra, pranim minimal i realitetit për ndryshim maksimal të tij”, ka deklaruar kryeministri.
