Kryetari i Vetëvendosjes, Albin Kurti ka treguar arsyet pse nuk e kishte lejuar ish-ministrin e Punëve të Brendshme, Agim Veliun të ndërhynte në Karaçevë, ashtu siç bëri mbrëmë.
Kurti ka konfirmuar se Veliu i kishte kërkuar leje për ndërhyrje në Zubin Potok, e pastaj edhe në Karaçevë, por nuk i kishte sjellë një plan se si do të ndodhte i gjithë ky aksion, shkruan Insajderi.
Sipas tij këto kanë qenë arsyet pse nuk i ka dhënë dritën e gjelbër.
“Më lejoni ta përkujtojë ditën e dytë të punës sime si kryeministër, me datën 5 shkurt kur ai ish-ministri im i brendshëm patë ardhur me kërkesën për leje për një aksion në Zubin Potok pak më vonë pastaj edhe për një aksion në Karaçevë pa u bërë një muaj. Ndonëse me premtoi ky ministri i imi ai në të dy rastet pati dështuar të më sjell diçka me shkrim mbi përgatitjen dhe planet e aksionit policor, pra vetëm kërkonte lejen time pa informacion për mua. Por kjo nuk është mënyra se si duhet të veprojë qeveria e të marrë vendime kryeministri”, ka thënë Kurti, përcjell Insajderi.
Madje, mes tjerash ai ka hedhur edhe dyshimet rreth këtij aksioni duke thënë se shpreson të jetë i vërtetë.
Ish-kryeministri ka kritikuar ish-ministrin Veliu duke thënë se vinte i papërgatitur në takime.
“Unë kam kërkuar aso kohe aksion të përgatitur mirë e jo aventura. Vinte me fjalë goje pa asnjë letër në takim, pa hollësi të nevojshme të planifikimit që të kërkojë pëlqimin tim për aksion. Urojë që kësaj radhe të jetë ndryshe”, është shprehur ai.
Nga Prokuroria e Gjilanit kanë konfirmuar se operacion i mbrëmshëm, vlerësohet të jetë më i madhi i zhvilluar deri tani në Kosovë vije pas një hetimi gati njëvjeçar, lidhur me pretendimet për veprimtari të paligjshme në atë pjesë.
Ky aksioni është kryer nën dyshimin për bixhoz të paligjshëm, trafikim me njerëz, trafikim me armë, trafikim me narkotikë, kontrabandim me mallra dhe aktivitete të tjera kriminale.
E për këto dyshime, pas prangave janë vënë 33 persona, prej të cilëve 10 janë zyrtarë policorë, si dhe janë sekuestruar aparate të lojërave të fatit, rreth 120 gjedhe, si dhe gjësende të ndryshme si prova materiale, që dyshohet të jenë përdorur në aktivitete kriminale.
“Deri në lëshimin e kësaj komunikate, në lidhje me rastin janë arrestuar gjithsej 33 persona të dyshuar, në mesin e tyre 10 zyrtarë policorë, të cilët brenda afatit ligjor do të paraqiten para gjyqtarit të procedurës paraprake, janë sekuestruar aparate të lojërave të fatit, rreth 120 gjedhe, si dhe gjësende të ndryshme si prova materiale, që dyshohet të jenë përdorur në aktivitete kriminale”, ka njoftuar Prokuroria./Insajderi.org
