Kryeministri i Kosovës, Albin Kurti njëherit edhe kryetar i Lëvizjes Vetëvendosje ka vizituar varrin dhe ka vendosur kurora lulesh tek varri i Astrit Deharit, aktivistit të VV-së i cili para gjashtë vjetëve ka ndërruar jetë në burgun e Prizrenit ku po mbahej në paraburgim.
Kurti tha se Astrit Dehari ishte aktivist, student e patriot shembullor. Ai tha se VV-ja e mbanë gjithmonë në zemër Deharin sikur ai që e mbante Vetëvendosjen.
“Janë mbushur gjashtë vjet pa aktivistin, studentin, patriotin shembullor Atrti Dehari. VV e ka gjithmonë në zemër, ashtu si Astriti e kishte VV gjithmonë në zemër. Dhe sot Astrit e Arbënori janë të varrosur pranë njëri-tjetrit dhe në këtë gjashtë-vjetor të mbytjes së Astrit Deharit në burg të Prizrenit, vizituam familjen e tij dhe vendosëm lule të freskëta te varri i tij. Astrit Dehari është aktivisti i cili nuk shuhet kurrë dhe i cili na bën që ne t’ia përkujtojmë rrugën për të ardhur deri këtu”, u shpreh Kurti.
Astrit Dehari kishte vdekur në burgun e Prizrenit në vitin 2016, ku po mbahej në paraburgim.
Ai bashkë me disa aktivistë të VV-së dyshoheshin për sulm ndaj Kuvendit të Kosovë me armë zjarri, ku më pas ata ishin liruar nga këto akuza.
Familjarë por edhe nga partia e VV-së dyshojnë se Astrit Dehari ishte vrarë. Ndërsa që kjo çështje ishte dërguar edhe në institutin zvicran.
Prokuroria Speciale e Kosovës kishte thënë se në raportin e pranuar nga Instituti i Mjekësisë Ligjore në Lozanë të Zvicrës, më 1 prill të këtij viti për rastin e Astrit Deharit, është thënë se analizat e ADN-së, nga objektet që kanë qenë në kontakt me të ndjerin, nuk kanë treguar profil të ADN-së përveçse të vetë atij.
Disa prej objekteve të analizuara kanë qenë brisku i rrojës, stilolapsi i lidhur me një lidhëse këpucësh dhe një pjesë metali.
