Kryeministri i Kosovës, Albin Kurti, akuzon Serbinë dhe Rusinë për përgatitjen e kërcënimeve dhe ultimatumeve të reja ndaj Kosovës, duke theksuar se Serbia ende nuk ka pranuar përgjegjësinë për krimet e kryera gjatë luftës në Kosovë.
Kryeministri i Kosovës, Albin Kurti, e ka akuzuar Serbinë që në bashkëpunim me Rusinë po përgatit kërcënime dhe ultimatume të reja ndaj Kosovës.
Ai përmendi se, edhe 25 vjet pas përfundimit të luftës, Serbia ende mban të fshehura informacionet për vendndodhjen e të paktën 11 varrezave masive në territorin e saj, ku janë varrosur viktima të gjenocidit në Kosovë.
Kurti kujtoi se gjatë luftës 13 mijë njerëz u vranë, përfshirë fëmijë, gra, dhe të moshuar, ndërsa rreth 20 mijë gra dhe vajza u dhunuan dhe keqtrajtuan e për këtë Serbia nuk kërkoi asnjëherë falje.
“Vuçiq në koordinim me Rusinë, mbi varrezat masive, po përgatit kërcënime dhe ultimatume të reja ndaj Kosovës.
25 vjet pas gjenocidit në Kosovë, me 186 masakra, rreth 500 varreza masive në Kosovë, 5 varreza masive në Serbi, ku mbetën të vrarë mbi 13 mijë njerëz (1392 fëmijë; 1739 gra; 1882 të moshuar), rreth 20 mijë gra e vajza të dhunuara dhe keqtrajtuara, dhjetëra mijëra qytetarë të persekutuar, mbi 860 mijë të dëbuar nga Kosova dhe qindra mijëra të tjerë që nga malet shihnin qysh po ju plaçkiten e digjen shtëpitë (gjithsej 119,855 sosh), dhe ende 1595 persona të zhdukur me dhunë, qindra familje që jetojnë me ankth e dhembje, ndërsa i mbanë të fshehura informacionet për vendndodhjen e të paktën 11 varrezave masive brenda territorit të saj, Serbia e drejtuar nga ministri i Millosheviqit, në bashkëpunim me Rusinë, po përgatitin kërcënime dhe ultimatume të reja në drejtim të Kosovës.
Serbia flenë mbi varreza masive nga gjenocidi i kryer në Kosovë. 950 civilë të paarmatosur u masakruan, ua rrëmbyen kufomat dhe i futën në varreza masive në Serbi, përfshirë këtu kamionë frigoriferë që dolën nga fundi i liqeneve atje. Dëshmitë e gjenocidit janë të freskëta gjithandej në Kosovë e Serbi, por kjo nuk po e pengon Presidentin e Serbisë për të kërcënuar sërish”, ka shkruar Kurti në Facebook.
Ai gjithashtu theksoi se Serbia ka zgjedhur të mos reflektojë mbi krimet e saj, duke refuzuar të kërkojë falje, të hapë arkivat e luftës apo të bashkëpunojë për të vendosur drejtësi për viktimat e gjenocidit. Në vend të kësaj, sipas Kurtit, Serbia po koordinohet me Rusinë për të përsëritur kërcënimet dhe ultimatumet ndaj Kosovës.
“Në vend që Serbia:
- të pendohet për krimet, të kërkojë falje për to dhe të mos i mohojë ato;
- t’i hapë arkivat e luftës të policisë dhe ushtrisë jugosllave, sidomos të brigadës së motorizuar 37;
- të paguajë dëmshpërblimet;
- të bashkëpunojë për të vendosur drejtësi për viktimat e gjenocidit;
- të angazhohet për pajtim e paqe duke reflektuar mbi përgjegjësinë që ka;
ajo ka zgjedhur anën e kundërt, duke përsëritur kërcënimet dhe ultimatumet, ndaj Kosovës dhe qytetarëve të saj, në bashkëpunim dhe koordinim të afërt me Rusinë. Krimet makabre që Serbia para 25 vjetëve i kreu në Kosovë, sot po përsëriten nga Rusia në Ukrainë dhe po synohen që të kthehen prapë në rajonin e Ballkanit”, ka shtuar Kurti.
Kurti paralajmëroi se kërcënimet dhe sulmet e paramilitarëve dhe terroristëve po normalizohen nga Serbia, duke u mbështetur në fushata dezinformuese dhe lajme të rreme.
“Qasja e pushtetit në Serbi ndaj Kosovës është tejet dëshpëruese. Fillimisht u normalizua pandëshkueshmëria dhe fushatat propaganduese. E tash po synohen të normalizohen sulmet paramilitare dhe terroriste (Banjska, 24 shtator 2023), kërcënimet dhe ultimatumet, të cilat arsyetohen me lajme të rrejshme dhe fushata dezinformuese, para syve të botës demokratike.
Sot, Kosova është më e fortë se kurrë më parë, nuk trembet nga kërcënimet. Ne mbrojmë të gjithë qytetarët tanë dhe liritë e të drejtat e tyre, integritetin territorial dhe sovranitetin shtetëror të vendit tonë, progresin demokratik e socio-ekonomik të popullit dhe institucioneve tona. Mirëpo, kjo që po ndodhë aktualisht, tregon se sa larg është Serbia nga vlerat demokratike dhe njerëzore dhe sa e mishëruar mbetet me gjenocidin e kryer në vitet e ‘90-ta”, ka përfunduar Kurti.
