FC Drita, përmes një komunikate për media, ka bërë të ditur një lajm të kobshëm për komunitetin sportiv dhe më gjerë.
Klubi ka njoftuar se Elife Sherifi, ka ndërruar jetë në një moshë të re, duke lënë pas dhimbje të thellë tek familjarët, miqtë dhe të gjithë ata që e njohën dhe bashkëpunuan me të.
Komunikata e plotë:
Me pikëllim të thellë morëm lajmin për ndarjen nga jeta, në moshë të re, të bashkëpunëtores sonë të dashur, Elife Sherifi.
Elifja ishte një profesioniste e shquar në fushën e gazetarisë dhe një adhuruese e flaktë e klubit tonë, shumë kohë përpara se të merrte detyrën e zëdhënëses së klubit – pozitë të cilën e mbajti me përkushtim të jashtëzakonshëm për më shumë se gjashtë vite.
Puna, përkushtimi dhe dashuria e saj për klubin do të mbeten përherë pjesë e kujtimeve tona më të çmuara.
Klubi ynë FC Drita shpreh ngushëllimet më të sinqerta për familjen Sherifi, miqtë dhe të gjithë ata që e njohën, për këtë humbje të madhe.
Në këto momente të vështira, qëndrojmë pranë familjes dhe ndajmë dhimbjen me ta.
U prehtë në paqe, Elifja.
