Burime brenda Lidhjes Demokratike të Kosovës bëjnë të ditur se brenda partisë kanë nisur diskutimet për përbërjen e listës zgjedhore, ndërsa tashmë disa emra nga dega e Gjilanit janë duke u përfolur si kandidatë potencialë për deputet.
Sipas burimeve, ndër emrat më të diskutuar janë kryetari i degës, Lutfi Haziri, si dhe kryetarja e Forumit të Gruas, Valentina Bunjaku-Rexhepi. Po ashtu, në listë pritet të jetë edhe kardiologu i njohur Besim Guda, i cili prej kohësh përmendet si përforcim profesional brenda strukturave të LDK-së.
Burime të njëjta bëjnë të ditur se në procesin e shqyrtimit janë edhe dy emra të tjerë: ish-drejtori i “Hidromorava”-s, Muhamet Suliqi, si dhe ish-zëvendësministri Rexhep Kadriu, të cilët po konsiderohen si pjesë e garës për deputet nga kjo degë.
Diskutimet brenda LDK-së pritet të vazhdojnë deri në finalizimin e listës përfundimtare, ndërsa emrat e konfirmuar zyrtarisht do të publikohen në ditët në vijim./Radio Star/
