Ylli i Kosovës, Edon Zhegrova, është shumë afër të bëhet pjesë e gjigantit italian Juventus. Lajmi është bërë i ditur fillimisht nga gazetari sportiv Arlind Sadiku, i cili ka konfirmuar se marrëveshja mes palëve tashmë është arritur.
Sipas raportimeve, Zhegrova ka dhënë pëlqimin për një kontratë pesëvjeçare me “Zonjën e Vjetër”, me pagë rreth 2.5 milionë euro në vit plus bonuse. Klubi italian ka arritur marrëveshje personale me lojtarin, ndërsa pritet finalizimi i negociatave me Lille, ku lojtari ka kontratë deri në vitin 2026.
Kosovari pritet të udhëtojë sonte drejt Torinos për të kompletuar procedurat e transferimit, ndërsa prezantimi zyrtar është paralajmëruar për nesër.
Ky është një hap i madh në karrierën e 25-vjeçarit, i cili me paraqitjet e tij të shkëlqyera në Ligue 1 ka tërhequr interesimin e disa klubeve evropiane, por duket se Juventus ka fituar garën për nënshkrimin e tij.
Transferimi i Zhegrovës tek Juventusi pritet të jetë një nga lëvizjet më të bujshme të merkatos, duke shënuar gjithashtu një moment historik për futbollin kosovar.
