Fotografi i njohur kosovar, Arian Mavriqi, ka ndërmarrë një iniciativë vullnetare për pastrimin e hapësirave publike në komunën e Kamenicës, duke dhënë një shembull të mirë për qytetarët.
Ai ka pastruar një pjesë të shëtitores së qytetit, ku kishte mbeturina të shumta të hedhura nga vizitorët. Përmes këtij aksioni, Mavriqi ka bërë thirrje që secili qytetar të japë kontributin e vet në ruajtjen dhe mirëmbajtjen e ambientit.
“Kështu ishte, dhe kështu e lash unë! Shpresoj që të punojmë gjithë bashkë për Kosovën tonë të dashur, e pa mbeturina”, ka shkruar ai në rrjete sociale, duke publikuar edhe pamje nga puna e tij.
Iniciativa e tij është pritur me shumë reagime pozitive nga qytetarët, të cilët kanë përgëzuar fotografin për angazhimin e tij. Ai ka theksuar se mjedisi i pastër nuk është vetëm përgjegjësi e institucioneve, por mbi të gjitha një kulturë që duhet ta kultivojmë si shoqëri./Radio Star/
