Futbollisti gjilanas, Mirlind Daku, shkëlqeu sot në ndeshjen e Rubin Kazan kundër Orenburgut, ku realizoi dy gola të rëndësishëm (në minutat 16’ dhe 34’), por emocionet e tij shkuan përtej fushës së lojës.
Vetëm një ditë pasi u nda nga jeta gjyshi i tij, Daku gjeti forcën të luante dhe t’i dedikonte golat bacit Haxhi, siç e thërriste me dashuri. Poshtë fanellës së klubit rus, sulmuesi kuqezi mbante një bluzë të bardhë me fotografinë e gjyshit, të cilën e shfaqi me mall e dhimbje pas golave.
Ndeshja përfundoi me rezultat 2-2, ndërsa Daku luajti gjithë 90 minutat, u ndëshkua me një karton të verdhë në minutën e 57-të dhe u vlerësua si më i miri i takimit me notën 8.9 nga “Sofascore”.
Lot, mall, krenari dhe dhimbje u bashkuan sot në përqafimin e këtij dedikimi të veçantë. E gjithë bota e futbollit shqiptar është me ty, Mirlind Daku.
