Stafi shëndetësor i Spitalit të Gjilanit është marrë nën hetim dje nga prokuroria, pas vdekjes së një gruaje të moshuar.
Djali i kësaj të fundit, ka akuzuar stafin shëndetësor se nuk i kanë dhënë ndihmën e nevojshme viktimës, duke mos e futur në sallën e operacionit menjëherë pasi është pranuar në Emergjencë.
Si pasojë e gjendjes së rënduar shëndetësore, viktima e moshës 92-vjeçe, s’ka arritur që të presë për intervenimin dhe ka ndërruar jetë.
Si rezultat i këtij denoncimi nga familjari i viktimës, njësitë policore kanë dalë në vendin e ngjarjes dhe kanë marrë të gjitha veprimet e nevojshme që ndihmojnë në zbardhjen e rrethanave të rastit.
Raporti i plotë i Policisë:
MOSDHËNIA E NDIHMËS MJEKËSORE
Gjilan 09.05.2023 – 14:30. Ankuesi mashkull kosovar ka raportuar se dyshohet se si pasojë e mosdhënies së shërbimit mjekësor viktima femër kosovare ka ndërruar jetë. Lidhur me rastin në vendngjarje kanë dalur njësitë kompetente policore për trajtim të rastit, ndërsa me urdhër të prokurorit të shtetit trupi i pajetë i viktimës është dërguar në IML për obduksion.
