Pranimi teknik i punëve dhe projekteve të Ministrisë së Infrastrukturës bëhet nga komisionet me përbërje jo kompetente.
Në raportin e Zyrës Kombëtare të Auditimit konstatohet se pranimi teknik dhe vlerësimi i gjendjes së ndërtimit, ishte bërë nga komisionet në përbërje të dy ekonomistëve.
Për projektet ‘’Ndërtimi dhe Asfaltimi i rrugës Sikivjan- Novosellë’’dhe “Ndërtimi i rrugës Demjan-Pnish” kemi identifikuar se përbërja e komisioneve për pranimin e punëve nuk ishte nga anëtarët me kompetencë dhe njohuritë nga fusha e kërkuar.
Kjo çështje ishte ngritur edhe në raportet paraprake të auditimit, mirëpo ministria nuk e kishte adresuar në arsyetimin e numrit të madh të projekteve dhe numrit të pamjaftueshëm të inxhinierëve.
Ndikimi Pranimi teknik dhe vlerësimi i gjendjes së ndërtimit nga zyrtarë jo kompetent, rritë rrezikun e pranimit të projekteve jo në pajtueshmëri me standardet dhe cilësinë e kërkuar.
Rekomandimi i Zyrës Kombëtare të Auditimit në këtë çështje është se ministri duhet të siguroj se pjesë e komisioneve për pranimin e projekteve dhe punëve, do të jenë zyrtarët me kualifikime përkatëse, me njohuri të specializuar në infrastrukturën rrugore, që do të ofronin siguri se projektet janë realizuar në pajtueshmëri të plotë me standardet e ndërtimit./Media Ndërtimi.
