Me 19 janar u bënë gjashtë vite prej ndarjes nga jeta të babait tonë, Sabit Rexhepi, ish i burgosur politik dhe veprimtar i palodhur i çështjes kombëtare.
I lindur më 7 janar 1947 në Skifteraj të Vitisë, Sabit Rexhepi që herët u rreshtua në anën e idealeve për liri dhe dinjitet. Për bindjet dhe veprimtarinë e tij atdhetare u arrestua dhe u dënua me burg politik, duke kaluar vite të vështira nëpër burgjet e regjimit të asaj kohe. Edhe në rrethana të rënda, ai e përballoi dënimin me qëndresë dhe pa u lëkundur nga parimet e tij.
Pas daljes nga burgu, ai vazhdoi angazhimin e tij, duke dhënë kontribut të vazhdueshëm për idealet në të cilat besonte. Ky angazhim i tij u njoh edhe zyrtarisht me pajisjen me certifikatë veterani.
Gjatë jetës së tij, Sabit Rexhepi mbeti një njeri i qetë në fjalë, por i vendosur në qëndrim; i përkushtuar ndaj shoqërisë dhe i palëkundur në besimin se sakrifica për të drejtën ka kuptim vetëm kur bëhet me ndershmëri dhe pa zhurmë. Pas luftës, ai vazhdoi të kontribuojë në jetën institucionale dhe shoqërore, duke dhënë ndihmesën e tij edhe në ruajtjen e kujtesës së ish-të burgosurve politikë.
Për ne si familje, ai ishte mbi të gjitha një baba i dashur, i urtë dhe shembull i forcës morale. Na mësoi se dinjiteti është vlerë që nuk humbet kurrë dhe se njeriu matet me qëndrimin e tij, jo me fjalë të mëdha.
Një nderim i veçantë iu bë babait tonë në vitin 2025, kur një rrugë në Gjilan, në lagjen ku familja jonë ka jetuar gjatë periudhës së veprimtarisë së tij, mori emrin e tij. Edhe pse ai është arrestuar herën e parë në vendin e punës, rruga që mban emrin e tij lidhet me vendin ku ai ka vepruar dhe ku ne kemi jetuar, duke ruajtur kujtimet tona dhe duke përfaqësuar një vlerë të veçantë për familjen.
Edhe pse fizikisht nuk është më mes nesh, kujtimi, vepra dhe emri i tij jetojnë te ne dhe tek ata që e njohën. Ai do të mbetet gjithmonë krenaria jonë dhe pjesë e historisë sonë familjare dhe shoqërore.
Me mall dhe respekt të përjetshëm,
Familja e Sabit Rexhepit
(7 janar 1947– 19 janar 2020)
