Grevat e paralajmëruara në fillim të vitit të ri shkollor nuk do të mbahen. Sindikata e Bashkuar e Arsimit ka bërë të ditur se, për shkak të mosformimit të institucioneve, nuk do të ketë veprime sindikale. Megjithatë, kjo sindikatë nuk e ka përjashtuar mundësinë që një gjë e tillë të ndodhë pas formimit të institucioneve, varësisht nga përgjigjja që do të marrin lidhur me kërkesat e tyre.
Mosrealizimi i kërkesave për rritje pagash, përmirësim të kushteve të punës dhe kontratë kolektive bëri që SBASHK, muaj më parë, të paralajmëronte grevë në fillim të shtatorit.
Por, Sindikata e Bashkuar e Arsimit ka vendosur që viti i ri shkollor të mos nisë me greva e protesta në shkollat e vendit.
Shtyrja e këtyre veprimeve sindikale, sipas kryetarit të SBASHK-ut, Rrahman Jashari, po ndodh për një arsye:
“Në takimet dhe konsultimet që i kemi zhvilluar pas kongresit të jashtëzakonshëm, kemi ardhur në përfundim se protesta dhe greva nuk do të ketë në fillim të shtatorit, ngase u vonua konstituimi i institucioneve”, ka thënë Jashari.
Por Jashari nuk e përjashton mundësinë e hyrjes në grevë:
“Si SBASHK jemi të përgatitur për dialog. Jemi në pritje të institucioneve dhe pastaj gjithçka varet prej tyre. Nëse ata duan dialog, do të jemi shumë të lumtur. E nëse nuk duan, ne e kemi autorizimin nga kongresi i jashtëzakonshëm që të fillojmë me veprime sindikale. Pra, asnjëherë SBASHK-u nuk e përjashton dialogun, por as veprimet sindikale – protestat dhe grevat”, është shprehur tutje Jashari.
Ndërkohë, sipas ekspertit të arsimit, Argjend Osmani, SBASHK-u nuk duhet ta përdorë grevën si mjet të parë për të shprehur pakënaqësitë.
“Greva është forma dhe mënyra e fundit e shprehjes së pakënaqësisë. Duhet pasur parasysh që kërkesat e mësimdhënësve janë të arsyeshme, por qeveria nuk i ka trajtuar si të tilla. Kujtojmë se vitin e kaluar, mësimdhënësit u ofenduan shumë rëndë nga qeveria”,ka thënë Osmani.
Edhe njohësi i arsimit, Rinor Qehaja, konsideron se greva do të ndikonte negativisht në procesin mësimor.
Kujtojmë që në vitin 2022, mësimi kishte filluar me një muaj vonesë për shkak të grevave të organizuara nga Sindikata e Bashkuar e Arsimit./teve1/
