PDK në Gjilan ka reaguar ashpër ndaj menaxhimit të projekteve infrastrukturore nga ekzekutivi komunal, duke e akuzuar kryetarin Alban Hyseni për mashtrim dhe keqmenaxhim. Sipas opozitës, rrugët “Adem Jashari” dhe “Zijah Shemsiu” janë ndërtuar pa standarde dhe megjithëse punimet nuk kanë përfunduar plotësisht, ato figurojnë si të realizuara në raportin vjetor të komunës.
Në një komunikatë për media, PDK thekson se infrastruktura nëntokësore për energjinë elektrike, e cila supozohej të ishte përfunduar, në fakt nuk është realizuar fare, ndërsa rrugët vazhdojnë të jenë të hapura për ndërhyrje. Partia opozitare kërkon llogaridhënie dhe apelon për transparencë në menaxhimin e fondeve publike.
Statusi i plotë:
𝐌𝐀𝐒𝐇𝐓𝐑𝐈𝐌𝐈 𝐈 𝐒𝐇𝐄𝐊𝐔𝐋𝐋𝐈𝐓 𝐄 𝐊𝐀 𝐄𝐌𝐑𝐈𝐍 – 𝐀𝐋𝐁𝐀𝐍 𝐇𝐘𝐒𝐄𝐍𝐈
A ka fund kjo tallje me qytetarët e Gjilanit? Rruga Adem Jashari dhe Zijah Shemsiu jo vetëm që janë ndërtuar pa asnjë standard, por edhe në raportin vjetor të komunës paraqiten si të përfunduara. A e dini çka është edhe më e rëndë?
🔹Pika 6: Sipas Alban Hysenit, infrastruktura nëntokësore për energjinë elektrike është kryer. Gjendja faktike? ZERO punë. Nuk janë hapur as puseta, as kanale pra, është lënë hapësirë për mashtrime të ardhshme. Kabllot elektrike ishin të parapara për t’u futur nëntokë, por ato vazhdojnë të qëndrojnë njejtë, si më parë. Si mund të paguhet një projekt i parealizuar?
🔹Pika 7: Sipas Hysenit, projekti ka përfunduar dhe është paguar në vitin 2024. Jemi në fund të marsit dhe ende ka prishje, ndreqje dhe punë të papërfunduara. A thua qytetarët nuk e shohin që ende punohet e rrugët janë të hapura?
Ky njeri ka dëshmuar se është tinëzar, mashtrues klasik dhe punët e tij kanë përfunduar njësoj si rruga Gjilan-Kllokot, një dështim total.
Ku është drejtësia? Pse askush nuk po merret me keqpërdorimet dhe keqmenaxhimin e ekzekutivit të Gjilanit?
