Kryetari i Gjykatës Supreme, Fejzullah Rexhepi, Kryesuesi i Këshillit Gjyqësor të Kosovës (KGJK), Albert Zogaj, Kryesuesja e Panelit për Lirim me Kusht (PLK), Valdete Daka me anëtarët e PLK-së, si dhe Drejtori i Përgjithshëm i SKGJK-së, Shkëlzen Maliqi, po qëndrojnë për vizitë në Portugali.
Në kuadër të agjendës, Kryetari i Gjykatës Supreme, Fejzullah Rexhepi dhe Kryesuesi i Këshillit Gjyqësor të Kosovës, Albert Zogaj, janë pritur në takim nga Kryetari i Gjykatës Supreme të Portugalisë, João Cura Mariano.
Tutje, delegacioni nga Kosova ka mbajtur takime edhe me Nënkryetarin e Këshillit të Lartë Gjyqësor në Portugali, LuisAzevedo Mendes dhe Shefen e lartë të nënkryetarit dhe anëtarëve të KLGJ-së, Catarina Escudeiro, ku janë njoftuar me organizimin dhe funksionimin e Këshillit të Lartë Gjyqësor në Portugali, si dhe praktikën e shërbimeve të inspektimit në vlerësimin e performancës së gjyqtarëve.
Delegacioni është takuar edhe me gjyqtarët e Gjykatës për Ekzekutimin e Dënimeve, me ç’rast janë njoftuar për sistemin sprovues portugez, me theks si të veçantë mbi kushtet dhe rrethanat që ndikojnë në lirimin me kusht, si paraqitja e kërkesës fillestare, vendimmarrja dhe e drejta e ankimimit, gjithashtu u diskutua edhe lidhur me ekzekutimin e dënimeve në çështje penale dhe ekzekutimin e masave të detyrueshme të trajtimit rehabilitues.
Takimet kanë vazhduar me përfaqësuesit e Drejtorisë së Përgjithshme për Riintegrim dhe Shërbime të Burgjeve nga Ministria e Drejtësisë së Portugalisë, me ç’rast janë pritur nga Udhëheqësja e Divizionit për Menaxhimin e Trajtimit në Burgje, Natércia Fortunato, për të shkëmbyer ide rreth organizimit dhe funksionimit e sistemit portugez të burgjeve dhe riintegrimin social të të burgosurve.
Gjatë ditës së dytë, pjesëmarrësit vizituan burgun e Carregueirës dhe u pritën nga Drejtoresha e këtij burgu, JoanaFortunato.
Delegacioni përgjatë realizimit të kësaj vizite, ka falënderuar përfaqësuesit e sistemit gjyqësor të Portugalisë, për mbështetjen e vazhdueshme që ky vend i ka dhënë sistemit gjyqësor të Republikës së Kosovës.
Pjesëmarrësit kanë vizituar edhe Ambasadën e Republikës së Kosovës në Portugali dhe janë pritur nga Ambasadorja e Kosovës, Edona Maloku-Bërdyna.
