Procesi i prokurimit për rindërtimin dhe përshtatjen e Stadiumit në Gjilan është pezulluar pas paraqitjes së dy ankesave në Organin Shqyrtues të Prokurimit (OSHP) shkruan Radio Star.
Pezullimi është bërë në mbështetje të Nenit 108/A të Ligjit për Prokurimin Publik të Republikës së Kosovës dhe do të mbetet në fuqi deri në marrjen e një vendimi të ri nga autoritetet përkatëse.
Tenderi i pezulluar përfshinte punë ndërtimore për zbatimin e projektit të detajuar të rregullimit hapësinor, arkitekturës dhe inxhinierisë, në përputhje me Kategorinë IV të rregulloreve dhe udhëzimeve teknike të UEFA-s për infrastrukturën e stadiumeve. Numrat zyrtarë të tenderit janë 207-24-8996-5-1-1 dhe 207-24-079-5-1-1.
Arsyeja kryesore e pezullimit lidhet me ankesat e paraqitura nga dy operatorë ekonomikë, të cilat aktualisht po shqyrtohen nga OSHP. Autoritetet kanë njoftuar se vendimi përfundimtar do të bëhet publik sapo të përfundojë shqyrtimi i rasteve.
