Përveç avokatit kryesor dhe atij mbështetës, askush tjetër nuk do të mund t’i vizitojë në Qendrën e paraburgimit në Hagë, të paktën për një kohë, Hashim Thaçin, Kadri Veselin e Rexhep Selimin.
Gjykata Speciale ka aprovuar kërkesën e Zyrës së Prokurorit të Specializuar duke i ndaluar vizitat te ish-pjesëtarët e UÇK-së dhe çdo komunikim me familjarë.
Sipas kërkesës së ZPS-së, Hashim Thaçi, Rexhep Selimi dhe Kadri Veseli kanë vepruar në kundërshtim me vendimet e gjykatës, duke zbuluar identitetin e dëshmitarëve të mbrojtur dhe dëshmive konfidenciale te personat që i vizitojnë ata në Qendrën e Paraburgimit.
Tutje, sipas ZPS-së, dëshmitarët kanë treguar se u janë ofruar njerëz të ndryshëm me porosinë nga të akuzuarit që ata t’i ndryshojnë deklaratat, çka kishte shtyrë Prokurorinë të nisë hetime.
“Këto rrëfime të dëshmitarëve vërtetohen nga Regjistrimet, të cilat – siç përshkruhet më poshtë – demonstrojnë se informacioni konfidencial, duke përfshirë identitetet e dëshmitarëve dhe udhëzimet që duhet t’u përcillen dëshmitarëve, në fakt po transmetohen nga Qendra e Paraburgimit”, thuhet në vendimin e Prokurorisë.
Sipas Prokurorisë, Thaçi dhe Veseli kanë dhënë udhëzime se si duhet të dëshmojnë dëshmitarët.
“Regjistrimet tregojnë se THAҪI ka abuzuar në mënyrë të përsëritur me vizitat e paprivilegjuara për të dhënë udhëzime se si duhet të dëshmojnë dëshmitarët. Dëshmitari i SPO-së [REDAKTUAR]. Më [REDACTED] vizitoi THAÇIN në Qendrën e Paraburgimit në Hagë. Gjatë vizitës, THAÇI udhëzoi në mënyrë të përsëritur [REDACTED] që t’i jepte udhëzime [REDACTED] se si të dëshmonte, duke përfshirë, ndër të tjera: (i) për të minimizuar lidhjen e tij me Shtabin e Përgjithshëm; (ii) të mohojë disa fakte që kanë të bëjnë me strukturën e UÇK-së; (iii) të jetë ‘i shkurtër’ nga frika e ‘rrëshqitjes’; (iv) si të përgjigjesh kur tregohen prova të veçanta; dhe (v) ‘Dil nga këtu një hero’”, thuhet në vendimin e Prokurorisë.
Avokatët e kredituar nga Specialja e konsiderojnë vendimin si pengesë në mundësinë që ata të lirohen me kusht.
Sipas avokatit Taulant Hodaj, të akuzuarit do të duhet të paralajmëroheshin nga mbrojtja rreth ndikimit të vizitave të shpeshta.
Ndërkohë, ZPS-ja ka kërkuar monitorim aktiv të të gjitha komunikimeve që mund t’i bëjnë të akuzuarit, duke kërkuar që ata të mos lejohen në hapësira të përbashkëta. Procesi gjyqësor për krime lufte ndaj Thaçit dhe të tjerëve filloi në muajin prill të këtij viti.
Ata po mbahen në paraburgim që nga nëntori i vitit 2020 me arsyetimin kryesor se nëse lirohen ka rrezik të ndikojnë te dëshmitarët.
