Kryetari i Komunës së Gjilanit, Alban Hyseni, ka publikuar pamje nga lagjja “Dheu i Bardh”, ku kanë nisur punimet e asfaltimit të disa rrugëve të rëndësishme për banorët e zonës.
Sipas Hysenit, rrugët po marrin formë dhe po i japin një pamje të re kësaj lagjeje, e cila për vite me radhë ka pritur investime infrastrukturore. Ai, bashkë me ekipin komunal, ka qenë në terren për të parë nga afër ecurinë e punimeve dhe për t’u siguruar që ato po realizohen sipas planifikimeve.
“Punët po ecin me intensitet të lartë dhe shumë shpejt banorët e ‘Dheut të Bardh’ do të kenë rrugë të reja, të asfaltuara dhe të sigurta për qarkullim”, ka theksuar Hyseni në postimin e tij.
Ky projekt është pjesë e planit të gjerë të Komunës së Gjilanit për përmirësimin e infrastrukturës rrugore në të gjitha lagjet dhe fshatrat e komunës.
