Reduktimet e energjisë elektrike në vend do të rikthehen, kështu ka paralajmëruar KEDS-i me anë të një komunikate dërguar mediave. Njoftimin qytetarët po e marrin edhe me anë të SMS-ve në telefon.
Shumë qytetarë të pakënaqur me reduktimet që janë paralajmëruar nga dita e nesërme, kanë publikuar këtë SMS në rrjetet sociale. I cili ua bën me dije se do të ketë kufizime të energjisë elektrike.
Reduktimet vijnë si pasojë e krizes elektroenergjetike botërore që ka prekur edhe Kosovën, ka njoftuar KEDS.
Mungesa e rrymës për 2 orë brenda 24 orëve të ardhshme do të prekë të gjithë konsumatorët.
“Këto kufizime do të jenë rreth dy orë dhe do të prekin të gjithë konsumatorët në kohë të ndryshme, përveç atyre emergjentë. Kjo situatë do të mbizotërojë gjatë 24 orëve të ardhshme, ndërsa për ditët në vijim në jemi në pritje të instruksioneve nga KOSTT-i dhe do të veprojmë konform tyre”, njofton KEDS, transmeton Express.
Njoftimi i plotë i KEDS:
Gjatë ditëve të fundit, sistemi elektroenergjetik i vendit është mbingarkuar tej mase. Të njëjtën kohë, duke u ballafaquar me krizën më të rëndë elektroenergjetike botërore, Operatori i Tregut- KOSTT, duke u bazuar në ligjet në fuqi, ka udhëzuar që të fillohet me kufizime të energjisë elektrike. Këto kufizime do të jenë rreth dy orë dhe do të prekin të gjithë konsumatorët në kohë të ndryshme, përveç atyre emergjentë.
Kjo situatë do të mbizotërojë gjatë 24 orëve të ardhshme, ndërsa për ditët në vijim në jemi në pritje të instruksioneve nga KOSTT-i dhe do të veprojmë konform tyre.
Sistemi elektroenergjetik i vendit është afektuar tashmë komplet nga kriza globale dhe pasojat e saj përballohen më lehtë, nëse secili nga ne jep kontributin e tij. Pra, që kriza të ketë ndikim sa më të vogël, KEDS apelon për kursim maksimal të energjisë elektrike dhe përdorim të formave alternative të ngrohjes, aty ku ka mundësi.
