Këngëtarja kosovare me famë botërore, Dua Lipa, ka reaguar pas dështimit të festivalit “Sunny Hill” në Prishtinë, festival ky që organizohet nga vetë ajo dhe babai i saj, Dukagjin Lipa.
Dua ka publikuar në InstaStory postimin e faqes zyrtare të festivalit ku njoftohet se festivali do të zhvendoset në Tiranë, shkruan Gazeta Online Reporteri.net.
Ndryshe, Festivali “Sunny Hill” nuk do të mbahet në Kosovë, ashtu siç ishte parashikuar organizimi i tij në Bërnicë të Poshtme.
Gazeta Online Reporteri merr vesh se Festivali “Sunny Hill” do të mbahet këtë vit në Tiranë, dhe ky vendim siç bëjnë të ditur këto burime, erdhi si pasojë e zvarritjes së procedurave nga ana e Qeverisë për ta bërë të mundur mbajtjen e festivalit.
Festivali ku tashmë veçse janë konfirmuar artistët e parë pjesëmarrës, përfshirë edhe DJ të njohur në botë, ishte planifikuar të mbahej në data 4-7 gusht 2022.
Në muajin maj të këtij viti, Kuvendi Komunal i Prishtinës votoi që kompanisë “Sunny Hill” t’i jepet prona 17-hektarëshe në Bërnicë të Poshtme në shfrytëzim për 99 vjet.
Por procedurat e mëtejme janë zvarritur në Qeveri, gjë që ka bërë që organizatorët e kësaj ngjarjeje të tërhiqen përfundimisht nga organizimi në Prishtinë i festivalit, për ta zhvendosur atë në Tiranë këtë vit. /Reporteri.net/.
