Ministria e Arsimit, Shkencës, Teknologjisë dhe Inovacionit (MASHTI) vitin e kaluar kishte marrë vendim që pajisjen e nxënëseve me tekste shkollore ta bëjë nëpërmjet platformës e-kosova, duke i subvencionuar financiarisht prindërit për blerjen e librave.
Por kjo metodë e furnizimit të nxënësve me libra shkollorë, përfshirë edhe vonesat e shkaktuara nga shtëpitë botuese, ishte kritikuar nga opozita dhe ekspertët e fushës.
Më i zëshmi ndaj këtij vendimi të ministres së Arsimit, Arbërie Nagavci, ka qenë kryesindikalisti i arsimit, Rrahman Jasharaj, i cili madje këtë vit të ri shkollor paralajmëron sërish greva.
Kryetari i Sindikatës së Arsimit, Rrahman Jasharaj e ka kritikuar ministren e Arsimit për platformën e re të furnizimit me libra. Ai thotë se Nagavci duhet ta pranojë se ka gabuar me këtë vendim.
Jasharaj thotë se në shtator mund të rikthehen sërish grevat e mësimdhënësve, pas pakënaqësive që, sipas tij, janë rritur.
“Nagavci duhet ta pranojë këtë gabim e të mos e përsërisë më. Por prapë nëse do të vazhdojnë në këtë mënyrë, shtatori do të jetë me mungesa të teksteve, mund të ketë edhe grevë sepse pakënaqësitë e mësimdhënësve janë rritur e dialog me Sindikata s’po ka”, tha Jasharaj.
I pari i SBASHK-ut ka kërkuar që nxënësit të furnizohen në shkolla me libra jo përmes subvencionimit.
“Vendimi i MASHTI-t është kritikuar për mënyrën e re për furnizim me libra për nxënësit, kemi insistuar të vazhdojë tradita e kaluar që tekstet të jenë gratis dhe të dërgohen në komuna e pastaj në shkolla e mësimdhënësit të merren me shpërndarjen e tyre”, tha ai për FrontOnline.
