Kosova rrezikon të mbetet pa mjekë, pasi çdo muaj po ikin nga vendi profesionistët shëndetësorë.
Papunësia, kushtet jo të mira të punës e pakënaqësitë me shumën e pagës janë disa nga arsyet kryesore pse mjekët po e braktisin Kosovën.
Ministria e Shëndetësisë thotë se është duke punuar të krijojë kushte me të mira për stafin shëndetësor në vend dhe se po i përkrah dhe mbështet mjekët.
“Ministria e Shëndetësisë është duke vazhduar me investime në infrastrukturë e pajisje mjekësore, në mënyrë që profesionistët të mund të shfaqin gjithë potencialin e tyre. Edhe në buxhetin e këtij viti është paraparë sigurimi i aparaturave, me qëllim të ngritjes së shërbimeve të reja”, thonë nga Ministria e Shëndetësisë për FrontOnline.
Po ashtu, MSH-ja thotë se do të ketë rritje të pagave edhe vitin e ardhshëm.
“Qeveria e Kosovës ka rritur pagat për profesionistët shëndetësorë dhe aktualisht paga e një mjeku në Kosovë është ndër më të lartat në rajon. Krahas zhvillimit ekonomik me progres pozitiv rritja në koeficientin e pagës do të vazhdojë edhe vitin e ardhshëm”.
Nga kjo ministri thonë se janë duke mbështetur mjekët, të cilët kanë zgjedhur të punojnë vetëm në sektorin publik
“Ministria e Shëndetësisë është duke mbështetur mjekët, të cilët kanë zgjedhur të punojnë vetëm në sektorin publik me shtesë në pagë”, thonë nga MSH-ja.
Kreu i Odës së Mjekëve të Kosovës, Pleurat Sejdiu, ka treguar numrin e mjekëve që janë larguar nga Kosova përgjatë tre muajve të parë të këtij viti.
“Sa i përket numrit të mjekëve, trendi po vazhdon i njëjti. Deri më sot janë 29 mjekë që kanë marrë dokumentacionin e duhur për punësim në shtetet evropiane. Pra janë 29 mjekë që janë larguar në tre muajt e parë të këtij viti e që është numër i njëjtë me tre muajt e parë të vitit të kaluar”, thotë ai.
Sejdiu thotë se arsyet e largimit të mjekëve nga Kosova janë papunësia, kushtet e punës dhe kushtet e kualitetit të shkollimit specialistik.
“Ne tash e sa vite bëjmë një sondazh ose pyetësor për arsyet e largimit të mjekëve që po largohen nga Kosova dhe arsyeja kryesore e largimit është papunësia, sepse kemi 441 mjekë të papunë, të deklaruar në Ministrinë e Financave dhe ATK, kjo është arsye e parë dhe arsye e dytë janë kushtet e punës dhe kushtet kualiteti i shkollimit specialistik. Arsye e tretë janë pagat, duke pasur parasysh se te këta janë shumica mjekë të përgjithshëm të diplomuar dhe paga e tyre është rreth 700 euro”, tha ai.
Kreu i Odës së Mjekëve të Kosovës më tej tregon se ka më shumë se dy vjet që Oda të cilën ai e drejton nuk ka pasur takim me Ministrinë e Shëndetësisë.
Sipas Sejdiut, Oda që ai drejton, por edhe oda të tjera kanë kërkuar takim me ministrin e Shëndetësisë, Arben Vitia, por nuk kanë marrë përgjigje.
“Në takime me MSH-në nuk kemi pasur tash e më shumë se dy vjet, përveç raporteve tona të rregulla që i dërgojmë të gjitha e ku përfshihen këto që i ceka më lart. Ne kemi bërë kërkesë zyrtare gjithë kryetarët e odave, para afro dy muajsh që të bëjmë një takim dhe të diskutojmë me ministrin rreth implementimit të legjislacionit që u përket odave dhe MSH-së, por përgjigje nuk kemi marrë dhe nuk e dimë arsyen’’, shprehet Pleurat Sejdiu, kryetar i OMK-së.
Shqetësues largimin e mjekëve nga Kosova e sheh edhe Tevide Imeri, kryetare e Federatës së Sindikatave të Shëndetësisë. Ajo thotë se nëse vazhdon ky trend do të jetë shqetësues.
“Nëse ndiqet trendi i largimit të mjekëve si në vitin 2023, duke ia shtuar këtu faktin edhe të masave të reja, të cilat i kanë marr vende si Gjermania, mund të themi se numri për këtë vit mund të jetë edhe më shqetësues’’, thekson Imeri.
Imeri thotë se sipas informatave që ajo ka janë rreth 300 mjekë dhe infermierë që kanë ikur nga Kosova.
“Nuk kemi numër të saktë për këtë tremujor. Diku rreth 300 është numri sipas informatave që kemi”, ka deklaruar ajo.
Për Imerin, sfiduese vazhdon të jetë mungesa e mjekëve dhe anesteziologëve.
“Vazhdon të jetë sfiduese mungesa e mjekëve të punës, anesteziologëve dhe kuadrove deficitare”, ka thënë Imeri.
Ajo thotë se janë takuar me ministrin e shëndetësisë Arben Vitia, ku kanë marrë edhe disa zotime.
“Jemi takuar me ministrin Vitia në kuadër të partneritetit social e ku kemi diskutuar për këtë çështje dhe mbetët prioritet i angazhimit tonë nga ai kemi marrë premtime për angazhimin e tij në përmirësimin e cilësisë së ofrimit të shërbimeve përmes zhvillimit të kuadrove, kushteve të punës dhe edukim të vazhdueshëm profesional”, thotë Imeri për FrontOnline.
Edhe për Shemsedin Dreshajn, nga Komisioni për Shëndetësi dhe Mirëqenie Sociale, mbetet shqetësim ikja e profesionistëve shëndetësorë nga Kosova
“Ikja e mjekëve nga Kosova dhe mosndërmarrja e hapave nga MSH-ja ose Qeveria në drejtim të ndaljes dhe kërkesave që trasojnë momentin e tërheqjes së licencës nga oda e mjekëve, për t’u brengosur”, thekson ai.
Dreshaj më tej tregon se ka pasur takime me ministrin Vitia ku kanë ngritur këtë shqetësim, por që sipas tij nuk ka pasur ndonjë premtim e aq më pak veprim.
“Ne kemi pasur takime me ministrin Vitia si në Grupin Parlamentar, si në Kuvendin e Kosovës kur e kemi ngritur këtë shqetësim e po ashtu edhe në tryezat në debat publik, në të gjitha këto ky problem është ngritur, është debatuar, është diskutuar por deri më sot nuk ka ndonjë veprim konkret nga ana e kësaj Qeveri dhe nuk ka pasur diçka konkrete që ka premtu e aq më pak që ka vepru”, u shpreh Dreshaj.
