Vazhdojnë kritikat me thumb të drejtuesve të Lëvizjes Qytetare “Vatra” në adresë të kryetarit të Komunës së Gjilanit, Lutfi Haziri. Kjo lëvizje shprehet e pakënaqur me punën e të parit të komunës andaj shpesh herë duke përdorur performanca, kritika të drejtpërdrejta apo edhe kritika me sarkazëm, atakon të parin e komunës për, siç thonë, keqqeverisje e mospunë.
Kësaj here, Kushtirm Kadriu, kreu i Lëvizjes Qytetare Vatra duke përdorur sarkazëm, ka kërkuar që kreu i Gjilanit, Lutfi Haziri të marr ndonjë pozitë në qeverinë e Kosovës, kur ajo të formohet, në mënyrë që të angazhohet në Prishtinë e ta lë Gjilanit, pasi, sipas Kadriut, ai nuk po qeverisë mirë, kështu që qytetarët nuk do të vuajnë më nga mospuna e tij, transmeton Portali 2LONLINE.com
“Isa Mustafa le ta bëjë Lutfiun zyrtar në qeveri. Kjo është lutje e qytetarëve të Gjilanit të cilët po vuajnë nga mospuna e tij në Gjilan. Emërimi i tij në ndonjë pozitë qeveritare, e më shumë ceremoniale do t’i bënte hajr Gjilanit e pak dëm qeverisë, si shembull zëvendësministër apo zëvendës ambasador, diçka të tillë e me pak përgjegjësi”, ka thënë Kadriu.
Kadriu vlerëson se ky veprim do të pëlqehej nga gjilanasit, pasi që z. Haziri shumicën e kohës e kalon në Prishtinë.
“Kryetar Mustafa, ju lutem mbajeni z. Hazirin në Prishtinë sepse nga mosinteresimi i tij po vuajmë një qytet i tërë. Po vuajmë për ujë, po vuajmë nga mosefikasitetin e komunës, thjeshtë kemi mbetur pa zot shpie”, thotë në reagimin e tij Kadriu i Vatrës, transmeton 2LONLINE.
