Transformimi i FSK-së në ushtri, është temë e cila ka vite që është duke u përmendur. Mirëpo një vendim për këtë drejtim nuk është marrë ende. Në çdo qeverisje ka pas premtime se Forcat e Sigurisë së Kosovës do të transformohen në Forca të Armatosura të Kosovës. Madje edhe kryeministri i ri, kishte thënë se më së largu në mars do të kemi ushtrinë.
Por, Ramush Haradinaj i ka ndryshuar fjalët. Kur na ndajnë pak ditë nga muaji mars kur premtoi formimin e ushtrisë, kryeministri nuk jep afat se kur Kosova do të bëhet me ushtri.
Këto ditë kryeministri Ramush Haradinaj po qëndron në SHBA. Gjatë takimit me udhëheqësit e Gardës Kombëtare të Ajovës ai foli për bashkëpunim të dy vendeve dhe Kosovën e quajti me fat që ka partnerë të tillë.
Por Kryeministri Ramush Haradinaj refuzoi të japë një afat se kur do të ndodh transformimi i FSK’së të cilin po e presin tash e disa vjet qytetarët e Kosovës.
“Tani nuk po foli në detaje. Por sa më shpejt që ta kemi të kryer atë pjesë do të mundemi me ju kthy punës që me e aftësu Forcën tonë. Kuptohet se është fat i madh që kemi partnerë si Gardën kombëtare te Ajovës edhe ushtrinë e Amerikës”, tha Haradinaj.
Shpresat që formimi i ushtrisë do të bëhet më së largu në mars, i ka shuar edhe ministri FSK-së.
Transformimi i Forcës se Sigurisë së Kosovës në Forca të Armatosura pritet të ndodhë gjatë këtij viti ose në vitin e ardhshëm, ka deklaruar ministri i FSK’së, Rrustem Berisha.
Ministri këto komente i bëri kur u pyet gjatë vizitës që i bëri dje kryetarit të Komunës së Deçanit.
“Ne jemi në rrugë të mirë që kjo të ndodhë përmes ndryshimeve kushtetuese dhe mendoj se viti 2018/2019 do jetë vit i transformimit”, tha ministri Berisha për kallxo.com
Ministri i Forcës se Sigurisë tha se rruga më e mirë e transformimit në Forca të Armatosura është përmes ndryshimeve kushtetuese.
“Ne jemi duke punuar në transformimin përmes ndryshimeve kushtetuese, për shkak se edhe integrimi në NATO është shumë më i lehtë për ne”, ka thënë ai.
“Mendoj që në këtë drejtim jemi në rrugë të mirë. E kemi në plan të Strategjisë se integrimit edhe komunitetin jo shumicë, jemi duke bërë përpjekje që të jetë pjesë e transformimit të FSK-së dhe në kuadër të saj e kemi plan të veprimit ku pothuajse shumica e aktiviteteve që janë të parapara me këtë plan janë në përfundim e sipër”, tha Berisha
