Ministri në detyrë për Komunitete dhe Kthim në Qeverinë e Kosovës, Dalibor Jevtiq, gjatë ditës së djeshme ka pasur një aksion humanitarë në Komunën e Vitisë, në këtë kohë kur kjo komunë po përballet me pandeminë e koronavirusit.
Siç mëson Plus TV, Ministri serb Jevtiq, ka marrë pjesë në shpërndarjen e ndihmave vetëm për familjet serbe duke i injoruar komunitetet tjera që jetojnë këtu si kroatët dhe ashkalinjtë, ani pse Ministria që ai drejton është e thirrur për të punuar në interes të të gjitha komuniteteve.
Kryetari i Komunës, Sokol Haliti, ka thënë është në dijeni se Ministri Jevtiq, ka marrë pjesë në shpërndarjen e ndihmave për serbët por se ai nuk ka takuar dikë nga përfaqësuesit e komunës.
Sipas Haliti, ky aksion është ndërmarrë pa një bashkëpunim me zyrën e kryetarit dhe as me komitetin emergjent lokal në Viti, ku bëjnë pjesë edhe përfaqësues të komuniteteve, lidhur me menaxhimin e situatës me koronavirus.
Haliti thotë se Ministri ka bërë diskriminim ndaj familjeve në nevojë dhe ka anashkaluar institucionet komunale, gjatë këtij aktiviteti humanitarë.
“Kemi informacione se z. Jevtiq, ka marrë pjesë në shpërndarjen e ndihmave vetëm për komunitetin serb, por i rikujtojmë se ai është Ministër në detyrë, në Republikën e Kosovës, për të gjithë qytetarët e vendit, veçanërisht në këtë kohë të pandemisë të mos bëhen diferencime në baza etnike apo fetare, sepse lufta ndaj pandemisë është luftë e përbashkët dhe në interes të shëndetit publik”, u shpreh Haliti.
Ai tha se si komunë bashkë me donatorët kanë shpërndarë mbi 1300 pako ushqimore dhe higjienike për të gjithë ato familje që kanë pasur nevojë pa dallime.
PlusTV ka tentuar të marr një përgjigje nga Ministria përkatëse, por të këta të fundit nuk i janë përgjigjur thirrjeve telefonike. Kurse, në faqen zyrtare të Ministrisë në fjalë është njoftimi ku thuhet se Ministria për Komunitete dhe Kthim ka filluar një aksion social “Të fitoj jeta” për të ndihmuar ata që kanë nevojë në 18 komuna të Kosovës në këtë kohë të koronavirusit.
“Aksioni “Të fitoj jeta” kryhet në bashkëpunim të ngushtë me komunat, në përputhje me të gjitha masat e përcaktuara mbrojtëse për përfaqësuesit e Ministrisë për Komunitete dhe Kthim dhe vullnetarët që marrin pjesë në shpërndarjen (300) të paketave të ndihmës, ku përfitim të drejtpërdrejtë kanë afërsisht 907 persona “, thuhet në njoftimin e Ministrisë për Komunitete.
Logoja e aksionit “Të fitoj jeta”
Televizioni merr vesh se pako me ushqim dhe higjienë me 2 prill janë shpërndarë edhe në Komunën e Kllokotit nga kryetari i kësaj Komune bashkë me përfaqësuesit e Ministrisë së Komuniteteve dhe Kthimit, të udhëhequr nga Ministri Dalibor Jevtiq.
Kryetari i Kllokotit, Bozidar Dejanoviç, ka thënë se ndihmat vijnë nga një donator anonim nga Mitrovica e Veriut e në foto shihet se pakot kanë logon e aksionit të Ministrisë në këtë kohë të pandemisë.
