Ministri i Punëve të Brendshme, Xhelal Sveçla, ka ndarë detaje mbi arsyet e suspendimit të drejtorit rajonal të Policisë, në Mitrovicën e Veriut, Nenad Gjuriq.
Sipas Sveçles, suspendimi i Gjuriqit ka ardhur si rrjedhojë e refuzimit të zbatimit të vendimit legjitim të institucioneve të Republikës së Kosovës, si dhe si pasojë e cënimit të rëndë të sigurisë dhe stabilitetit të vendit.
“Në kuptim të këtyre veprimeve të përsëritshme, pas kërkesës së Inspektoriatit Policor të Kosovës dhe inicimin e hetimeve penale, është suspenduar Drejtori Rajonal i Policisë në Mitrovicën e veriut, Nenad Gjuriq” shkroi Sveçla në facebook.
Ky është postimi i plotë i tij:
Refuzimi i zbatimit të vendimit legjitim të institucioneve të Republikës së Kosovës është mbi të gjitha cënim i rëndë i sigurisë dhe stabilitetit të vendit tonë.
Në kuptim të këtyre veprimeve të përsëritshme, pas kërkesës së Inspektoriatit Policor të Kosovës dhe inicimin e hetimeve penale, është suspenduar Drejtori Rajonal i Policisë në Mitrovicën e veriut, Nenad Gjuriq.
Policia e Kosovës është një dhe të gjithë pjesëtarët e saj duhet të kenë të njëjtin mision: sundimin e ligjit dhe krijimin e ambientit të sigurtë për të gjithë qytetarët pa dallim. Nuk do të lejojmë asnjë veprim që cënon këtë mision dhe bashkë me Policinë e Kosovës do të vazhdojmë zbatimin e tij.
