Kryeministri i Shqipërisë, Edi Rama u ka sugjeruar mësuesve që të shfaqin në shkolla serialin “Adoleshenca”, për të ndihmuar në kuptimin e sfidave me të cilat përballen të rinjtë sot.
“Do t’ju sugjeroja që të shikon një film që ka dalë së fundmi që quhet ‘Adoleshenca’, ta ndanit me të tjerë dhe të bënim shfaqje filmi me nxënësit. Është një film që ka tronditur botën dhe flet për sfidat dhe sa larg jemi ne dhe sa pak kuptojmë ne kur na duket se kuptojmë shumë nga fëmijët tanë,” u shpreh Rama.
Ndërkohë, ai foli edhe për platformën TikTok, e cila mbetet e bllokuar në Shqipëri, duke theksuar se do të rihapet vetëm nëse kompania garanton siguri për përdoruesit e mitur.
“Më vjen mirë që sot TikTok është mbyllur dhe që fëmijëve, nxënësve iu kemi siguruar një mbrojtje nga një influencë shumë negative që i qëndronte mbi kokë 24/24. Përpjekja për të instaluar TikTok duke përdorur VPN është shumë e rrezikshme, sepse ato praktikisht e bëjnë telefonin të grabitshëm me të gjitha të dhënat që ka brenda,” tha ai.
Sipas Ramës, qeveria shqiptare është në dialog me kompaninë TikTok për vendosjen e filtrave të sigurisë për fëmijët dhe për programe edukative.
Ai u shpreh optimist se përfaqësues të TikTok do të vijnë së shpejti në Shqipëri për të diskutuar këtë çështje.
