Skuadra e njohur nga Gjilani, FC Drita, ka zyrtarizuar transferimin e mesfushorit Vesel Limaj. Klubi ka bërë të ditur se ka arritur marrëveshje me lojtarin për një kontratë dyvjeçare, me mundësi vazhdimi edhe për një vit tjetër.
Limaj, i cili së fundmi ishte pjesë e FC Malishevës, është prezantuar nga drejtori sportiv i klubit, z. Valon Zymberi. Ky i fundit theksoi se pas përpjekjeve të vazhdueshme në të kaluarën, këtë herë klubi arriti të sigurojë shërbimet e një prej mesfushorëve më cilësorë në kampionat.
“Veseli është një lojtar që e kemi ndjekur prej kohësh. Besojmë se ai do të sjellë kualitet dhe stabilitet në mesin e fushës,” u shpreh Zymberi pas prezantimit të lojtarit.
Mesfushori do të jetë në dispozicion të trajnerit Ramadani duke filluar nga data 1 korrik, dhe pritet të luajë një rol kyç në skemat e sezonit të ri.
Limaj njihet për vizionin në lojë, disiplinën taktike dhe përvojën në futbollin vendor, duke u konsideruar si një përforcim me peshë për ambiciet e Dritës në edicionin e ardhshëm.
