Ministri i Shëndetësisë, Armend Zemaj, sot ka vizituar Klinikën e Anesteziologjisë dhe Mjekimit Intensiv në Shërbimin Spitalor dhe Klinik Universitar të Kosovës, për të parë nga afër trajtimin mjekësor që po u ofrohet të prekurve nga COVID-19.
Përmes një postimi në rrjetin social Facebook, Zemaj tha se ditëve të fundit ka një rënie të rasteve spitalore, shkruan Reporteri.net.
Po ashtu sipas tij, klinikat spitalore kanë furnizime stabile, falë blerjeve nga MSH dhe kontributit të donatorëve ndërkombëtar, të cilët po mbështesin Kosovën me donacione.
Zemaj bëri të ditur se në bashkëpunim me SHSKUK-në, janë kthyer në mobilizim të plotë kapacitetet e disa klinikave në Prishtinë dhe të spitaleve rajonale.
Ky është postimi i tij i plotë:
Në Klinikën e Anesteziologjisë dhe Mjekimit Intensiv në SHSKUK në Prishtinë pashë nga afër trajtimin mjekësor që po iu ofrohet të prekurve nga Covid19 dhe pacientëve që trajtohen me respiratorë.
Dr. Naim Kuqi u.d. shef i kësaj klinike prezantoi shërbimet që po kryhen në këtë klinikë, gjendjen e pacientëve, vështirësitë dhe nevojat e stafit mjekësor.
Është lajm i mirë se ditëve të fundit ka një rënie të rasteve spitalore.
Shpresojmë se ky trend të vazhdojë ditëve në vijim.
Në klinikat spitalore aktualisht kemi furnizime stabile, falë blerjeve nga Ministria e Shëndetësisë, sikurse dhe kontributit të donatorëve ndërkombëtarë, të cilët po vazhdojnë të na mbështesin me donacione në këtë kohë të pandemisë.
Ndërsa, për të qenë të gatshëm për çdo skenar, në bashkëpunim me SHSKUK-në kemi rikthyer në mobilizim të plotë kapacitetet e disa klinikave në Prishtinë, sikurse kemi aktivizuar edhe klinikat e tjera të spitaleve rajonale.
E falënderova personelin shëndetësor që po bën një punë shumë efikase dhe po ofron shërbime cilësore shëndetësore për të gjithë pa dallim.
Së bashku do ja dalim!
Vendosni maska!
Mbani higjienën!
Ruajeni distancën fizike!
#QeveriaHoti
