Presidenti i Kroacisë, Zoran Milanoviq, ka propozuar që Kosovës dhe Bosnjës e Hercegovinës t’iu jepet statusi i kandidatit për pranim në Bashkimin Evropian, pas propozimit që Ukraina të pranohet në BE sa më shpejt që të jetë e mundshme.
Sipas Milanoviqit, duhet të bëhet gjithçka që kriza e nisur në Ukrainë si pasojë e pushtimit nga Rusia, të parandalohet që të zgjerohet në Ballkanin Perëndimor.
“Është interes strategjik dhe kombëtar i Kroacisë që shtetet në Evropën juglindore, që kanë deklaruar dhe kanë dëshmuar gatishmërinë dhe qëllimin që t’i bashkohen BE-së, të bëhen anëtare të Bashkimit Evropian sa më shpejt që është e mundshme. Prandaj, presidenti Milanoviq u ka propozuar iniciatorëve të letrës së hapur që statusi i kandidatit për pranim në BE të kërkohet për Bosnje e Hercegovinën dhe Kosovën dhe që BE-ja, pas premtimeve të përsëritura, menjëherë të nisë negociatat për pranim me Maqedoninë dhe Shqipërinë, që tashmë kanë statusin e kandidatit. Po ashtu, negociatat me Malin e Zi duhet të shpejtohen”, thuhet në komunikatën e Presidencës kroate.
Sa i përket Serbisë, sipas tij, ky shtet duhet të vendosë tash nëse dëshiron t’i bashkohet BE-së apo jo dhe të ndjekë politikën që e cakton.
“BE-ja duhet t’ia bëjë me dije Serbisë se tani është momenti për të vendosur”, thuhet në njoftim.
