Abdixhiku në njëvjetorin e Qeverisë “Kurti 2”: Ne do t’i japim fund qeverisjes populiste në Kosovë
22/03/2022 | 12:41
Kryetari i LDK-së, Lumir Abdixhiku e ka quajtur të dështuar qeverisjen një vjeçare të “Qeverisë Kurti 2”.
Abdixhiku ka thënë se në vitin e dytë të qeverisjes së Kurtit, qytetarët e Kosovës u përballën me një goditje të madhe ekonomike me rritjen e çmimeve.
Kreu i LDK-së tha se Qeveria e drejtuar nga Kurti me kokëfortësi ka refuzuar të ulë koston e përballueshërisë së qytetarëve të Kosovës.
“Në vitin e dytë të Qeverisë së paaftë u përballëm edhe me rritjen e çmimeve të papërballueshme për qytetarët. Në muajt e ardhshëm pritet që inflacioni pritet të jetë dyshifror. Qeveria e Kosovës me kokëfortësi ka refuzuar të ulë koston e përballueshmërisë së qytetarëve të Kosovës.
Tutje, Abdxhiku tha se partia që ai drejton nuk do të bëjë asnjëherë opozitën e Kurtit në Kuvend, të cilën ai e quajti opozitë shkatërrimtare për vendin.
“Ne do të bëjmë opozitën tonë origjinale. Nuk do të bëjmë opozitën e Kurtit. Ka vdekë ajo opozitë. Është shkatërrimtare për vendin. Mos kërkoni nga unë ta bëjë opozitën e Kurtit. Kjo është opozita jonë.
Ne edhe për zgjedhjet nacionale do të jemi gati. Jo polarizime shoqërore, jo kauza fiktive. Sot bëhen 6 vite nga kauza fiktive e Kosovës, ku sot njerëzit që e kanë lënë Kosovën pa liberalizimin po merren sërish me kauza fiktive. Ne do t’i japim fund qeverisjes populiste në Kosovës”, u shpreh Abdixhiku. /Reporteri.net
