Skemat e mashtrimit me biletat e aeroplanëve kane rifilluar edhe këtë sezon të këtij viti. Dhjetra qytetarë kanë rënë pre e një mashtrimi që ka ndodhur në këtë javë, transmeton Plus TV.
E ashtuquajtura agjensi turistike “Kosova Tours” me seli në Gjermani dhe Zvicer, ka bërë një skemë të mashtrim të madh, në të cilen kanë rënë pre dhjetra mërgimtarë që jetojnë në Evropë, por edhe turistë kosovarë që udhëtojnë drejt Evropës.
Kjo “agjensi” madje ka abuzuar edhe me emrin e një agjensie serioze e cila operon në qytetin e Vitisë. Pronari i agjensisë Kosova Tours, Florim Maliqi ka deklaruar për Plus TV se prej rreth një jave ka marr telefonata dhe ankesa të shumta nga qytetarët që kanë rezervuar bileta dhe janë mashtruar nga një agjension i rremë me të njejtin emër, i cili tashmë është zhdukur nga rrjetet sociale.
“Kemi pas shumë thirrje dhe na kanë shkruar në Facebook shumë qytetarë që janë mashtruar nga një agjensi që ka abuzuar edhe me emrin e agjensisë tonë “Kosova Tours”. Këta qytetarë janë joshur nga çmimet e ulta me rreth 50% më lirë se çmimet e biletave që aktualisht janë në treg. Ata kanë sponsorizuar në rrjetet sociale këto oferta mashtruese. Ne i kemi sqaruar se nuk kemi asnjë lidhje me këtë agjension dhe nuk qëndrojmë prapa tij. Ne do të bëjmë denoncim në Policinë e Kosovës për këto raste, pasi konsiderojmë se mund të dëmtohet reputacioni i agjensionit tonë”, ka thënë Maliqi.
Qytetarët që kanë rënë pre e këtij mashtrimi, kanë deklaruar se pagesat për bileta i kanë kryer në një llogari bankare e regjistruar në Zvicer dhe poashtu një tjetër në Gjermani. Madje këto llogari kanë titullar një person me emrin Zoltan Heghedus të cilat janë të hapura në bankën UBS Bank të Zvicrës.
Pronari i agjensionit “Kosova Tours” ka bërë thirrje që qytetarët duhet të kenë shumë kujdes nga këto mashtrime, pasi duhet të verifikojnë adresën dhe numrat e telefonit të secilit agjension.
Ai ka thënë se Kosova Tours prej vitesh ka faqën dhe llogon e saj zyrtare në rrjetet sociale dhe do të vazhdojë të jetë korrekte me klientët e saj, duke ju sjellur sherbime serioze dhe komoditet në udhëtim./PlusTV/
