Kushtrim Kadriu, asamblist i opozitës në Kuvendit Komunal të Gjilanit, nga radhët e Lëvizjes VATRA, ka reaguar pas raportimeve për keqpërdorime dhe nepotizëm, me shpërndarjen e grantëve në kulturë.
Në listën e përfituesve të konkursit të ri për subvencione në kulturë siç merret vesh nga mediat, është edhe organizata e ish-zyrtares së VV-së në këtë komunë, Ardiana Halimi.
Kadriu ka bërë një postim të shkurtë në profilin e tij në Facebook, duke pyetur se, A ka PROKURORI ky qytet?
Ndryshe, pasi fillimisht ishte anuluar procesi i parë i përfituesve të këtyre subvencioneve, për shkak të rasteve të keqpërdorimeve dhe nepotizmit, komuna hapi thirrje publike në muajin prill, për mbështetje të OJQ-ve dhe individëve.
Lista përfundimtare e përfitueseve të rinj u bë publike disa ditë më parë. Gazeta Insajderi mëson se Ardiana Halimi e cila dikur ishte Asistente e Sekretarit Organizativ në Qendrën e VV-së në Gjilan, u shpërblye me subvencionin nga komuna në vlerë prej 2,500.00€ me organizatën Vullnetaret e Qytetit.
