LAJMEOPINIONESPORTEKONOMINDËRKOMBËTAREJETËROZË
Qeveria: Këto dy vendime nuk i diskutojmë në Bruksel
07/08/2022 | 10:01
Qeveria: Këto dy vendime nuk i diskutojmë në Bruksel
Dy vendimet e Qeverisë së Kosovës për reciprocitetin në dokumente dhe targat ilegale nuk do të diskutohen në takimin e 18 gushtit në Bruksel, ndërmjet kryeministrit Albin Kurti dhe presidentit serb, Aleksandër Vuçiq.
Nga ekzekutivi thonë se vendimet janë të institucioneve të Kosovës dhe të parapara edhe në marrëveshjet e kaluara të Brukselit, andaj nuk mund të jetë temë e diskutimit.
Megjithatë, zëdhënësi i Qeverisë së Kosovës, Përparim Kryeziu, nuk tregon se cila do të jetë agjenda e takimit, derisa thotë për KosovaPress se nuk do të ketë takim në nivel të kryenegociatorëve, para atij të nivelit të lartë.
“Për agjendën e takimit do t’ju njoftojmë me kohë. Vendimet për targa dhe dokumente për hyrje-dalje janë vendime të qeverisë, që janë të parapara edhe në marrëveshjet për të cilat palët janë dakorduar në të kaluarën, andaj ato nuk mund të jenë temë diskutimi e këtij takimi”, tha Kryeziu.
Detaje për takimin e 18 gushtit nuk jep as zëdhënësi i Bashkimit Evropian, Peter Stano.
“Mund të konfirmoj se pasi Përfaqësuesi i Lartë Josep Borrell ftoi të dyja palët në Bruksel, presidenti Vuçi1 dhe kryeministri Kurti e pranuan ftesën e tij dhe ata do të priten në Bruksel më 18 gusht nga Përfaqësuesi i Lartë dhe përfaqësuesi special i BE-së Miroslav Lajçak për të diskutuar rrugën përpara në dialogun Beograd-Prishtinë. Do të ndajmë më shumë detaje rreth logjistikës dhe agjendës më afër ditës së takimit”, thekson ai.
Këtë takim e shohim me skepticizëm njohësit e procesit të dialogut.
Analisti politik, Artan Muhaxheri thotë se zhvillimet në veri të Kosovës kanë ndryshuar dinamikën e dialogut.
“Zhvillimet në Mitrovicën e Veriut kanë ndryshuar dinamikat e dialogut. Natyrisht nuk pritet që i njëjti të vazhdojë ashtu siç ishte para atyre ngjarjeve. Për këtë arsye, presioni i madh ndërkombëtar pritet të intensifikohet edhe më shumë, pasi kjo është mënyra e vetme që palët të kenë vullnet më të madh dhe mundësi për të arritur një zgjidhje. Zgjidhja natyrisht do të jetë kreative, pasi Serbia nuk mund të pranojë bllanko vendimin e Kosovës, s’i ka pranuar as vendimet e kaluara”, thotë ai.
Megjithatë, ai shton se Serbia mund edhe të tërhiqet nga refuzimi kategorik i dy vendimeve të Kosovës për reciprocitet dhe targa ilegale.
“Serbia është e njohur me stilin e saj që e tenton maksimumin, mirëpo dinë edhe të zmbrapset, të heq dorë, varësisht prej aleatëve. Unë nuk besoj se Serbia do të mund t’i bëjë ballë këtij presioni, mirëpo do të tentojë që të marrë diçka tjetër, apo zhvendos fokusin nga kjo marrëveshje me qëllimin që mos të shihet si një humbëse në raport me vendimin e Kosovës… Një muaj nuk është asgjë në raport me vendimin i cili pritet të hyjë në fuqi, por gjithashtu kemi një akter të ri, të cilët tashmë janë hisedar dhe në një mënyrë ambasadori e mori si një garanci edhe personale, zbatimin e kësaj marrëveshje edhe pas një muaji. Kjo nuk ka ndodhur më herët”, thekson ai.
Takimi Kurti-Vuqiç në Bruksel po mbahet pas më shumë se një viti, derisa kanë mbajtur një takim joformal muaj më parë në Berlin.
