Zyra e Kryeministrit ka njoftuar tash për këtë takim, duke bërë të ditur se edhe emisari i Bashkimit Europian për dialogun Kosovë – Serbi, Miroslav Lajçak do të jetë në të njëjtin takim.
Paraprakisht, Escobar dhe Lajçak do të shkojnë në Presidencë për t’u takuar me presidenten Vjosa Osmani.
Pas takimit me Kurtin, Escobar së bashku me ambasadorin amerikan Jeffrey Hovenier do të shkojnë në 16:00 në Zyrën e Bashkimit Europian në Prishtinë, aty ku emisari i BE-së për dialogun, Miroslav Lajcak do të jetë nikoqir i një takimi me krerët e opozitës.
Escobar mbrëmë i mblodhi krerët e opozitës në rezidencën e ambasadorit amerikan në Prishtinë, në një takim që zgjati dy orë.
Gati një javë pas takimit me presidentin serb Aleksandar Vuçiq, është planifikuar që kryeministri Albin Kurti të flasë sot për takimin e 18 gushtit në Bruksel. Qeveria do ta mbajë një mbledhje në orën 11:00 dhe në fillim të saj Kurti do të flasë për takimin me Vuçiqin.
Zbatimi i vendimeve të Qeverisë për targat e automjeteve dhe fletë-deklarimet në kufi si masë reciproke me Serbinë u shty për 1 shtator dhe tensionet në veri të Kosovës u ulën disi. Por tani shtatori është afruar dhe deri të mërkurën e javës së ardhshme Kurti e Vuçiq pritet të vihen sërish përballë njëri-tjetrit për ta arritur një marrëveshje.
Gjashtë muaj pas fillimit të pushtimit të Ukrainës nga Rusia, BE-ja dhe SHBA-ja po përpiqen ta parandalojnë një konflikt në Ballkan, me NATO-n që ka deklaruar disa herë se do të intervenojë në rast nevoje.
SHBA bëri me dije së fundmi se është e gatshme të përfshihet edhe me artilerinë e rëndë, Sekretarin e Shtetit. Për ta arritur një marrëveshje, Antony Blinken nuk do të hezitojë që të paktën t’i thërrasë në telefon Kurtin dhe Vuçiqin, ka konfirmuar zëdhënësi i Departamentit amerikan të Shtetit, Ned Price.
Rundi i fundit i dialogut nuk është konsideruar i mbyllur në BE deri sa të mos gjendet një zgjidhje.
