Kryeministri Albin Kurti së bashku me kolegë nga Kuvendi dhe me aktivistë të Lëvizjes Vetëvendosje ka bërë sot homazhe te pllaka përkujtimore për masakrën në lagjen “Dardania’’, duke i përkujtuar 40 të vrarët gjatë luftës së fundit nga forcat serbe.
Kryeministri Kurti ka kërkuar drejtësi për të vrarët gjatë luftës së fundit në Kosovë, e në veçanti të lagjes “Dardania” në Pejë.
Kurti tha se Serbia duhet të ballafaqohet me të kaluarën e saj kriminale dhe kërkoi më shumë punë nga Prokuroria Speciale në identifikimin e kryerësve të masakrave në Kosovë.
“Drejtësia dhe e vërteta janë të domosdoshme për paqe afatgjate dhe për siguri, për të gjithë dhe për marrëdhënie të mira fqinjësore e normale. Serbia duhet të ballafaqohet me të kaluarën e saj kriminale në Kosovë dhe Prokuroria Speciale duhet të punojë ditë e natë që t’i nxjerrë para drejtësisë përgjegjësit dhe në këtë mënyrë të fillojë rehabilitimi për viktimat. Dihet që viktimat nuk janë vetëm të vrarët e të rrëmbyerit por edhe familjet e tyre, farefisi i tyre dhe mbarë shoqëria jonë”, ka thënë Kurti.
