Fondi Kosovar për Efiqiencë të Energjisë përmes një komunikate për media ka dalë me disa sqarime për qytetarët e Kosovës të cilët kanë aplikuar për subvencione për projektin “Zbatimi i Masave të Efiçiencës së Energjisë për Shtëpitë Individuale të Banimit”.
Siç njofton FKEE, qytetarët që pranojnë “Letrën e Para-aprovimit”, janë të liruar nga pagesa e Tatimit mbi Vlerën e Shtuar për investimet që do të subvencionohen nga kjo masë.
Po ashtu, u bë e ditur se ky vendim është marrë me qëllim që qytetarëve të ju ofrohet ndihmë edhe më tutje për implementimin e masave të efiçiencës së energjisë.
Gjithashtu, në njoftimin e plotë të FKEE-së i gjeni disa pika sqaruese për aplikuesit, të cilët orientohen për veprimet e radhes.
Njoftimi i plotë:
Fondi i Kosovës për Efiçiencë të Energjisë njofton qytetarët e Republikës së Kosovës, të cilët do të pranojnë “Letrën e Para-aprovimit” për dhënien e subvencioneve për projektin “Zbatimi i Masave të Efiçiencës së Energjisë për Shtëpitë Individuale të Banimit”, se janë të liruar nga pagesa e Tatimit mbi Vlerën e Shtuar për investimet që do të subvencionohen nga kjo masë.
Ky vendim është marrë me qellim që qytetarëve të ju ofrohet ndihmë edhe më tutje në misionin për implementimin e masave të efiçiencës së energjisë, duke ndikuar në përmirësimin e mirëqenies së qytetarëve.
Bazuar në referencën e ATK-së nr. E-27/2023 të datës 24.08.2023, FKEE ofron sqarimet mëposhtme, për përfituesit e subvencioneve dhe bizneset:
Të gjithë përfituesit e subvencioneve për masat e Efiçiencës së Energjisë lirohen nga pagesa e Tatimit mbi Vlerën e Shtuar (TVSH). Lirimi nga TVSH bëhet për vlerën e plotë të projektit, pavarësisht vlerës së financuar nga Komisioni Evropian. Pra, të gjitha investimet lidhur me Projektin, në tërësi konsiderohen të liruara nga pagesa e TVSH-së. Lirimi i TVSH-së aplikohet vetëm për shumën e para aprovuar nga FKEE.
Lirimi prej TVSH-së duhet të bëhet direkt. Pra, me rastin kur kontraktohen punimet apo bëhet faturimi për blerje të mallrave, atëherë operatori kontraktues i regjistruar në TVSH nuk duhet ta llogarit TVSH-në, por duhet të faturojë pa TVSH (për përfituesin si individ) dhe në faturat e tyre të shkruajnë referencën ligjore: “Faturimi në bazë të nën-paragrafit 3.1, paragrafi 3 i nenit 33 të Ligjit nr. 05/L-037 për Tatimin në Vlerën e Shtuar”.
Të gjitha shërbimet të cilat janë për konsumatorin e fundit (personat fizik), tatimpaguesi obligohet të pajiset me arkë fiskale dhe të lëshoj kupon fiskal, edhe në rastet kur pagesa bëhet përmes POS-it bankar apo llogarisë bankare. Përjashtim nga ky rregull bëjnë kategoritë e përcaktuara me nën-paragrafin 2 të nenit 4 të Udhëzimit Administrativ nr. 02/2018, shërbimet që ofrohen nga institucionet që nuk obligohen të lëshojnë kupon fiskal, si dhe transaksionet biznes-biznes ku tatimpaguesi obligohet të lëshoj faturë tatimore sipas legjislacionit tatimor dhe nuk obligohet të lëshojë kupon fiskal.
Printimi dhe dhënia e kuponëve fiskal konsumatorëve është e detyrueshme në momentin e regjistrimit të furnizimit në PEF. Për transaksionet biznes-biznes, tatimpaguesi obligohet të lëshoj faturë tatimore.
FKEE njofton se komisioni po vazhdon me vlerësimin e aplikimeve për përfitim nga masa dhe të gjithë aplikantët e suksesshëm janë duke pranuar “Letrën e Para-aprovimit” bashkë me dokumentin që shërben si dëshmi për lirim nga TVSH.
