Janë dashur 15 vjet pritje që qytetarët e Gjilanit, veçanërisht “Intelektualët” e Dritës, të organizojnë festë për triumfin e titullit të Kampionit.
Me mijëra “Intelektualë” të moshave të ndryshme i pritën heronjtë e tyre para Teatrit të Qytetit në Gjilan, me këngë e brohoritje, të dielën në mbrëmje.
Për tifozët që nuk patën mundësi të shkonin në Pejë, për ta ndjekur nga afër ndeshjen e fundit Prishtina-Drita, që përcaktonte fituesen e titullit, organizatorët janë përkujdesur që të vendoset një ekran gjigant.
Dukeshin të qetë pasi skuadra e tyre edhe me barazim do të shpallej kampione dhe ashtu ndodhi.
Pas 90 minutash në pritjen e vërshëllimës së fundit të gjyqtarit kryesor Fatmir Tahiri, për disa minuta shpërtheu festa, madje edhe në lot të shumë atyre që ishin të pranishëm aty.
Qytetarët, pas pak minutash, u shpërndanë në pjesë të ndryshme të qytetit, për t’u mbledhur më pas në ora 21.
Një orë e gjysmë më pas në skenë u ngjitën 100 “Intelektualët”, të cilët kishin qenë në stadium, dhe aty filloi festa e vërtetë.
shkoi shumë dhe organizatorët i ftuan një nga një heronjtë e Dritës, që i sollën gëzimin qytetit që jeton për sport, titullin e më të mirit pas një dekade e gjysmë.
U bë ngritja e trofeut lartë dhe shpërtheu festa që zgjati pa mbarim.
Për stafin drejtues të skuadrës “Bardhekaltër”, ky është titull padyshim i merituar, që i dedikohet qytetit të Gjilanit, e që i mungonte tash e një kohë të gjatë.
Edhe futbollistët e kësaj skuadre iu gëzuan suksesit të dytë në histori të klubit gjilanas.
E për kryetarin e “Intelektualëve”, ky do të jetë vetëm suksesi i parë i shumë tjerëve që sipas tij e presin Dritën në të ardhmen.
Festa e tifozëve “Bardhekaltër” nga Gjilani së bashku me futbollistët e skuadrës kampione Dritës, për edicionin 2017/2018, vazhdoi deri në orët e hershme të mëngjesit.
