Deputeti gjilanas Luan Aliu ka njoftuar se është nominuar përsëri si kandidat për deputet në zgjedhjet e 9 shkurtit nga radhët e Lëvizjes Vetëvendosje.
Përmes një postimi në Facebook, ai ka treguar se do të mbajë numrin 64 në listën e Vetëvendosjes dhe ka kërkuar mbështetjen e qytetarëve për një mandat tjetër në Kuvendin e Kosovës.
Postimi i plotë:
Të dashur qytetarë, ju njoftoj se jam përsëri pjesë e listës së deputetëve të Lëvizjes VETËVENDOSJE!,
Me krenari, prezantoj veten si një zë të fuqishëm për qytetarët e Kosovës, duke mbështetur plotësisht kryeministrin Albin Kurti dhe Lëvizjen VETËVENDOSJE!.
Gjatë mandatit të Qeverisë Kurti, kemi arritur suksese të mëdha. Kemi investuar në sistemin arsimor, përmirësuar shërbimet shëndetësore dhe stimuluar rritjen ekonomike përmes politikave të mençura. Në fushën e sigurisë, kemi forcuar institucionet dhe bashkëpunimin me partnerët ndërkombëtarë, duke siguruar një mjedis të sigurt për të gjithë.
Mbështetja ime për kryeministrin Kurti është e palëkundur. Besoj në vizionin e tij për një Kosovë të drejtë dhe të zhvilluar. Së bashku, do të vazhdojmë të punojmë për një të ardhme më të mirë për çdo qytetar.
Ju ftoj të më mbështesni në këtë rrugëtim.
Me respekt,
Luan Aliu
