Kryetari i degës së LDK-së në Gjilan, njëherësh nënkryetar i LDK-së dhe kandidat për deputet, Lutfi Haziri, ka ushtruar të drejtën e tij të votës në shkollën fillore “Abaz Ajeti” në Gjilan. Pas votimit, ai ka dhënë një deklaratë për media, duke e cilësuar këtë ditë si një moment të rëndësishëm për qytetarët e Gjilanit dhe gjithë Kosovën.
“Uroj që çdo qytetar i Gjilanit sot ta ushtrojë të drejtën për të votuar. Kjo është një ditë e bardhë, një ditë e mirë për të gjithë ne. Kemi pasur një fushatë paqësore dhe një atmosferë dashamirësie që Gjilani e ka reflektuar, duke treguar lidhjen e fortë me qytetin dhe rajonin tonë. Në veçanti, ardhja e mërgimtarëve dhe pjesëmarrja e tyre në votim është një dëshmi e kësaj lidhjeje,” tha Haziri.
Ai shtoi se Gjilani gjithmonë ka treguar pjekuri dhe kulturë demokratike, duke bërë thirrje që çdo qytetar ta ushtrojë të drejtën e tij për të votuar.
“Uroj që secili prej tyre sot ta tregojë qartë vullnetin e tij dhe të rikthehet besimi që ka munguar shumë. Ushtroni të drejtën tuaj dhe dilni në votim!” përfundoi ai.
