Komisioni disiplinor i FIFA-s ka bërë publike dënimet dhe vendimet tjera për shkeljet e hetuara në ndeshjen e dytë të fazës së grupeve në Botërorin ‘Rusi 2018’.Të dënuar nga FIFA janë edhe dy lojtarët me prejardhje shqiptare të kombëtares së Zvicrës, Xherdan Shaqiri e Granit Xhaka, dhe zyrtarë të tjerë të federatës së Serbisë.
Në përgjigjen që komisioni disiplinor i FIFA-s ka konfirmuar për Insporti.com lidhur me takimin Zvicër – Serbi thuhet se për shkak të shkeljeve të nenit 57 të kodit disiplinor të FIFA-s, dhe sjelljeve josportive në kundërshtim me fair-play gjatë festimit të golave në takimin Zvicër – Serbi, lojtari Granit Xhaka dënohet me 10 mijë franga zvicerane, Xherdan Shaqiri dënohet me 10 mijë franga zvicerane (CHF), dhe Stephan Lichsteiner me 5 mijë CHF.Federata e futbollit e Serbisë është dënuar me 54 mijë CHF dhe tërheqje të vërejtjes për shkak të shfaqjes së flamujve me mesazhe diskriminuese dhe hedhje të objekteve në fushë nga ana e tifozëve serbë.Kryetari i Federatës së Serbisë, Slavisa Kokeza dhe selektori Mladen Krstajic për shkak të shkeljes së kodit disiplinor, gjegjësisht dhënies së deklaratave në kundërshtim me këtë kod, dënohet me nga 5 mijë CHF dhe vërejtje publike. /Insporti.com
