Nën organizimin e Drejtorisë Komunale të Arsimit, në Gjilan është mbajtur sot takimi i kryetarit Haziri me drejtorët e shkollave fillore, të mesme dhe ata të institucioneve parashkollore, me qëllim të bashkëbisedimit për gjendjen në përgjithësi të arsimit në këtë komunë.
Kryetari i Komunës, Lutfi Haziri ka ritheksuar faktin se sektori i arsimit vazhdon të mbetet prioriteti i qeverisjes.
“Takimi i sotëm me ju, menaxherët e shkollave, është jashtëzakonisht i nevojshëm për të paraqitur nevojat dhe kërkesat tuaja për ta rritur performancën e mësimdhënësve, e në të njëjtën kohë, dalin kuadro më cilësore. Në vitin 2019 besoj shumë që nxënësit e të gjitha shkollave të Gjilanit do kenë uniformë unike. Me këtë krijohet disiplinë dhe barazi sociale”, tha Haziri.
Haziri e ka vlerësuar punën e menaxherëve të shkollave për vitin shkollor që shkoi, ndërkaq ka paralajmëruar investime në të gjitha shkollat në aspektin e krijimit të hapësirave gjelbëruese e në aspekte tjera, me theks të veçantë në Bresalc, Kishnapole e Gadish.
Ai ka theksuar sfidën e madhe që ballafaqohet Gjilani, për faktin se mbi 3 milionë euro duhet orientuar në arsim për t’i mbuluar zbrazëtirat, e që i bie se 60 për qind e të hyrave komunale shkojnë për këtë sektor.
Ndërkaq, drejtori i DKA-së, Nazim Gagica, pasi ka paraqitur një elaborat për gjendjen në arsim, ka thënë se me vetë faktin se Gjilani ka rritje në testin e arritshmërisë për 2 për qind dhe atë të maturës me 4.5 për qind, tregon se është rritur cilësia.
Ndër sfidat që janë paraqitur në këtë takim është gjendja demografike e rënies së numrit të nxënësve, e cila reflekton me në zvogëlimin e normave për mësimdhënësit, hartimi i projektit ideor, analiza dhe parapërgatitjet për shkollat për mësim tërë ditor etj./kallxo/
