Federata e Futbollit të Kosovës, përmes një komunikate për shtyp ka reaguar ndaj zërave se biletat për ndeshjen mes Kosovës dhe Ishujve Faroe janë duke u shitur në treg të zi.
Shtëpia e futbollit kosovar ka sqaruar për opinionin se në bazë të ligjit nr 05/L-075, neni 10, pika 3 – një personi nuk mund t’i shiten më shumë se 7 bileta, njofton Klan Kosova.
Për të eliminuar këto probleme, Federata e Futbollit të Kosovës ka bërë të ditur se do tentojnë të mundësojnë nga loja e ardhshme shitjen e biletave në mënyrë elektronike.
Ndër tjerash FFK ka shtuar se vetëm biletat që kanë qenë të akorduara për shtëpinë e futbollit dhe ato pa çmim ishin pjesë e federatës, kurse biletat tjera nuk kanë qenë në dispozicion të saj.
Më poshtë është komunikata e plotë e FFK –së:
”Federata e Futbollit e Kosovës sqaron opinionin se qysh në fillim të përgatitjeve për ndeshjen Kosova – Ishujt Faroe, në kordinim të plotë me UEFA-n dhe pas kontraktimit me kompaninë për shitjen e biletave të ndeshjes, ka marrë vendim në bazë të ligjit për parandalimin dhe sanksionimin e dhunës dhe dukurive negative në ngjarje sportive, Ligji nr 05/L-075, neni 10, pika 3, që një personi nuk mund t’i shiten më shumë se 7 bileta. Ditët e fundit ka zëra se persona të caktuar kanë blerë numër më të madh të biletave dhe ato i kanë vendosur në shitje në treg të zi. FFK bën me dije se nuk mban përgjegjësi për shitjen e tillë të biletave dhe fton organet kompetente që të marrin masat e nevojshme që manipuluesit e tillë të vihen nën pranga dhe të dalin para drejtësisë, ngase në këtë mënyrë po i shkaktojnë dëme jo vetëm qytetarëve dhe institucionit tonë, por edhe po krijojnë imazh të keq para opinionit ndërkombëtar. Ne, si Federatë, do të bëjnë çmos që qysh nga ndeshja e ardhshme shitjen e biletave ta bëjmë nëpërmjet sistemit online, në mënyrë që dokuritë e tilla negative të mos përsëriten.
FFK njofton opinionin se përveç biletave që kanë qenë të akorduara për shtëpinë e futbollit dhe pa çmim, asnjë biletë tjerë nuk ka qenë në dispozicion të FFK-së.
Duke iu kërkuar falje të gjithë qytetarëve dhe dashamirëve të vërtetë të futbollit të cilët fatkeqësisht kësaj radhe nuk kanë mundur të pajisen me biletë për të parë Kombëtaren tonë, i lusim për mirëkuptim.
Njëherësh, meqenëse kjo është një ditë e veçantë për të gjithë ne, pasi për herë të parë do të luajmë ndeshje zyrtare në stadiumin “Fadil Vokrri” urojmë të gjithë dashamirët dhe i ftojmë që sonte të kenë anim të zjarrtë por korrekt për t’i dëshmuar botës që kemi kulturë të lartë sportive. Ndërkaq, të gjithë qytetarët që me gjithë dëshirën e madhe që të kenë një biletë por që nuk e patën një mundësi të tillë, urojmë që këtë ndeshje ta shijojnë me familjet e tyre nëpërmjet rrjeteve televizive.
Ju falënderojmë pëzemërsisht në mirëkuptim,
Me respekt,
Agim Ademi, president
Federata e Futbollit e Kosovës”
