Nënkryetari i Lidhjes Demokratike të Kosovës, Lutfi Haziri, ka folur për bashkëpartiaken e tij, Teuta Rugova, e cila po i “tradhton” qëndrimet e partisë.
Vajza e ish-presidentit Rugova, që e kishte përkrahur koalicionin PDK-AAK-Nisma, kishte vepruar përsëri kundër qëndrimit të partisë, pasi që kishte marrë pjesë në seancën e fundit të thirrur nga kryeministri Ramush Haradinaj për të votuar ekipin negociator.
Sipas Hazirit, ajo e ka qartësuar votën e saj qysh në fillim.
“Teuta Rugova e ka qartësuar votën e vet prej fillimit. Vota e Teuta Rugovës është kapitalizu në resort portfolio në ministri. Vota e saj është e definume, vota e saj është ndarë pro qeverisë qysh në fillim”, ka thënë Haziri për kallxo.com.
Sipas tij, LDK-ja ka treguar mirëkuptim për vendimin e Teuta Rugovës për shkak të personalitetit dhe figurës së Ibrahim Rugovës.
“Çështja e Teuta Rugovës nuk ka të bëjë me lojalitet në parti, ka të bëjë me një vendim që e ka marrë në fillim të mandatit dhe natyrisht që ne kemi tregu mirëkuptim ndaj personalitetit dhe figurës së shenjtë të Ibrahim Rugovës, por ma shumë i bie me mendu Teutës për të ardhmen e saj politike sesa ne për rolin e saj në grupin parlamentar”, tha Haziri.
