Ushtruesi i detyrës së Ministrit të Mjedisit dhe Planifikimit Hapësinor, Fatmir Matoshi në prag të aksionit “Ta pastrojmë Kosovën”, u ka bërë thirrje qytetarëve të vendit, institucioneve , bashkësive fetare, subjekteve politike, FSK-së, KFOR-it, shoqërisë civile dhe mediave, t’i bashkëngjiten aksionit nacional i cili fillon nesër .
Në një konferencë për media, ku morën pjesë anëtarët e task forcës, këshilltarja e Kryeministrit, Albena Reshitaj dhe drejtori i “Let’s Do It Kosova” Luan Hasanaj, ai ka prezantuar përgatitjet finale të Task Forcës qendrore dhe atyre komunale për aksionin “Ta pastrojmë Kosovën”, duke treguar se qëllimi i këtij aksioni nacional është pastrimi i mbeturinave të grumbulluara tash e 19 vite si dhe vetëdijesimi për ta ruajtur ambientin që na rrethon.
Thirrja ime për të gjithë qytetarët e Kosovës, institucionet , bashkësitë fetare, subjektet politike, shoqërinë civile dhe mediet është se kudo që nesër jeni, në lagje, rreth punës, shkollave, angazhohuni për një mjedis të pastër sepse meritojmë edhe ne, fëmijët tanë dhe brezat e ardhshëm një ambient të pastër sepse bëhet fjalë për shëndetin dhe jetët tona”, tha Matoshi.
Ai ka treguar se mbi 30 komuna të Kosovës kanë marrë vendime për themelimin e task forcave komunale që shumica nga to udhëhiqen nga kryetarët e komunave.
“Këto komuna e kanë kaluar testin e parë për të qenë potencialisht komuna të shpërblyera nga MMPH-ja në grantin prej 1.2 milion euro që veç e kemi shpallur si ministri”, tregoi Matoshi.
“ Ta pastrojmë Kosovën” do të fillojë me heqjen e deponisë ilegale afër Kompanisë së Ujësjellësit “KRU Prishtina” për tu përmbyllur tek pika kufitare “Dheu i Bardhë”.
