“Thirrja e fundit mungoi, sepse nuk ka luajtur. Lenjani nuk i ka shprehur mungesë respekti Panuccit apo Dukës, por Shqipërisë”, deklaroi trajneri italian
Shqipëria sonte në “Loro Boriçi” të Shkodrës e pret Turqinë në ndeshjen e parë kualifikuese për “Euro 2020”.
Takimi zhvillohet nga ora 20:45 dhe është shumë i rëndësishëm për kombëtaren shqiptare.
Mbrojtësi Elseid Hysaj ka thënë se janë gati, derisa ndihet i nderuar që është kapiten.
“Sulmuesit që ka Turqia i kemi takuar dhe në Serinë A dhe aty kemi të bëjmë në çdo ndeshje me lojtar të tillë dhe jemi përgatitur të mbrojmë mirë ndaj Turqisë. Është ndjesi shumë e mirë të jesh kapiten në qytetin e lindjes. Nëse është nevoja të bëj edhe një rol tjetër do ta bëj me gjithë maksimumin tim”, deklaroi Hysaj.
Christian Panucci u shfaq optimist para sfidës ndaj Turqisë. “Kanë punuar mirë. Është ambient mirë. Djemtë janë gati për ta luajtur këtë ndeshje. Të shikojmë… Është e vërtetë që kanë një skuadër të fortë, por nëse lojtarët kundërshtarë janë të përqendruar për 90 minuta, do të marrim një rezultat pozitiv. E dimë që është e vështirë, por shpresojmë”.
Ai komentoi edhe veprimin e Lenjanit. “Lenjani është grumbulluar tetë herë, nga nëntë grumbullime. Thirrja e fundit mungoi, sepse nuk ka luajtur. Lenjani nuk i ka shprehur mungesë respekti Panuccit apo Dukës, por Shqipërisë. Më vjen të qesh, të komentoj një lojtar që shkruan një letër në Instagram, dhe ajo që mund të bëj, është të pranoj kërkesën e tij”.
