Kryetari i Gjilanit, Lutfi Haziri, ka vizituar sot ndërmarrjen publike lokale “Stacioni Autobusëve”, ku është pritur nga menaxhmenti i saj.
Ai në këtë vizitë ka parë masat që i ka ndërmarr kjo kompani për përballimin e situatës me pandeminë ndonëse transporti publik ka ndërprerë aktivitetin që prej 13 marsit.
Haziri gjatë kësaj vizite ka folur, për projektin e ndërtimit të stacionit të ri të autobusëve, një projekt që kap vlerën e rreth 600 mijë eurove, investim ky që do të bëhet gjatë këtij viti.
“Jam këtu në vizitë, me drejtorin e stacionit dhe ekipin menaxhues për të parë situatën, po punojmë që të përgatitemi për ndërtimin e stacionit të ri një projekt që përfshin një vlerë prej 600 mijë euro, por që plotëson të gjitha nevoja e transportin urban, ndërurban, dhe komunikimin e qytetarëve me këto mjete të transportit”, tha Haziri.
“Nga raportet tona periodike, afër një milion njerëz qarkullojnë përmes stacionit të autobusëve, dhe formave të transportit që organizon ky operator, është shifër e madhe, ka nga të gjitha kategoritë e qytetarëve nga shumë komuna të regjionit, dhe njihet si pasqyrë e qytetit”, shtoi i pari i Gjianit teksa foli për rëndësinë e investimeve në infrastrukturën e transportit publik.
Nga ana tjetër Haziri, ka lavdëruar punën që po bëhet aty, ndërkaq ka theksuar në kjo ndërmarrje, me mbështetjen e Komunës, tashmë ka arritur qëndrueshmëri financiare dhe nuk e ka krijuar asnjë borxh që 6 vjet.
“Kjo ndërmarrje është e mirë, nuk e ka krijuar asnjë borxh qe 6 vjet dhe menaxhon me resurset financiare, që krijon të hyrat e veta, ka nevojë për zhvillim dhe nuk kanë mundësi me investu, ne jemi aksionar 100 përqind, dhe na bjen për hise me ridizajnu dhe me pa pamjen e re të stacionit, do të jetë në planet e investimeve këtë vit”, tha Haziri.
Ndërsa nga menaxhmenti i saj, kanë thënë se kjo ndërmarrje ka marrë të gjitha masat për mbrojtje nga koronavirusi dhe kanë dezinfektuar objektin por edhe të parët që kanë ndërprerë aktivitetin nga 13 marsi, shkaku i pandemisë.
Sipas tyre, është i mirëpritur projekti për rindërtimin, ridigjitalizimin dhe rimodernizimin e stacionit të autobusëve, dhe siç thanë, do të jetë më moderni në rajon me të gjitha kushtet./PlusTv/
