Dje është gjetur i vdekur Besnik Osmani, i zhdukur para 42 ditëve në fshatrat kufitare të Gjilanit, në kufirin mes Kosovës me Serbisë. Kryeprokurori i Prokurorisë Themelore të Gjilanit, Jetish Maloku, tha për Gazetën Express se rasti tani është duke u hetuar si vdekje e dyshimtë. Ai tha po ashtu se kur është gjetur trupi i viktimës ka qenë i dekompozuar në një masë të madhe.
Me datë 24 mars, Besnik Osmani kishte provuar të kalojë kufirin mes Kosovës dhe Serbisë në pikëkalimin kufitar të Muçibabës për të vazhduar në Preshevë.
I ndjeri ishte kthyer prapa për arsye të masave të ndërmarra për mbylljen e kufijve si pasojë e pandemisë Covid-19.
Ai kishte tentuar që përmes rrugëve malore të mbërrijë në Preshevë, por nuk kishte arritur. Vetura e viktimës u gjet në fshatin Muçibabë të njëjtën ditë që u shpall i zhdukur.
Viktima kishte pasur me vete një shumë parash me të cilat do t’i paguante punëtorët e tij pasi punonte si kontabilist.
Trupi i Bekim Osmanit u gjet dje në mes të fshatrave Llovcë dhe Burincë pranë lumit Llapushnicë në brezin kufitar Kosovë-Serbi që lidh Gjilanin me Preshevën.
Kryeprokurori i Prokurorisë Themelore të Gjilanit, Jetish Maloku, tha se rasti i zhdukjes së Besnik Osmanit ka qenë duke u hetuar nga Prokuroria Themelore e Prishtinës, ndërkaq tani hetimet do t’i vazhdojë Prokuroria Themelore në Gjilan.
“Deri tani e ka pasur rastin Prokuroria Themelore e Prishtinës, të cilët e kanë hetuar, ata do të na dorëzojnë rastin. Njëherë jemi duke bërë hetime, kufomën e kemi dërguar në obduksion, dhe ta shohim se a ka pasur shenja dhune se si po e vlerëson Instituti i Mjekësisë Ligjore”, i tha Maloku Gazetës Express të martën.
Ai ka konfirmuar se trupi i pajetë i Besnik Osmani i gjetur dje ka qenë i djegur në masë të madhe.
“Po, trupi i tij ka qenë bukur shumë i dekompozuar”, tha Maloku.
Trupi i viktimës dje është dërguar për obduksion në Institutin e Mjekësisë Ligjore, por ende nuk ka ndonjë raport për kufomën.
Përmes një komunikate, Prokuroria Themelore e Gjilanit, Departamenti për Krime të Rënda ka njoftuar se trupi i gjetur pa shenja jete në bazë të dokumenteve të identifikimit rezulton se bëhet fjalë për Besnik Osmanin (1978) për të cilin familjarët e kishin raportuar si person i humbur nga data 24 mars 2020.
Familjarët e kanë identifikuar kufomën e të ndjerit Bekim Osmani të gjetur dje. /GazetaExpress/
