Myftiu i Kosovës, Naim Tërnava ka bërë të ditur se tani për tani nuk ka kushte për hapjen e xhamive.
Përmes një konferencë për media, Tërnava tha se ky vendim erdhi pas konsultimeve që ka pasur me Drejtorin e Institutit të Shëndetësisë Publike të Kosovës, Naser Ramadani si dhe mikrobiologun Lul Raka.
Duke falënderuar Ramadanin dhe Rakën për punën e bërë, Tërnava tha se mendimi i tyre është që xhamitë të mos hapen pasi ende nuk janë krijuar kushtet për këtë.
“Nuk janë krijuar kushtet për hapjen e xhamive në Kosovë. Kështu janë mendimet e ekspertëve të kësaj fushe. Unë nuk e njoh këtë sëmundje, por këta kolegët këtu që kanë punuar natë e ditë për ne, do të japin mendimin e tyre për këtë. Ne do të shohim për mundësinë e parë për t’i hapur shtëpitë e Zotit”, tha Tërnava.
Kurse Drejtori i IKShPK-së, Naser Ramadani deklaroi se mbyllja e xhamive ka qenë falënderimi më i madh që besimtarët kanë mundur të bëjnë për mjekët në këtë kohë.
Ramadani shtoi se shpreson që shumë shpejt do të mund të shohin mundësitë për hapjen e xhamive.
“Ky është falënderimi më i madh i Bashkësisë Islame, për të mbyllur foltoret në mënyrë që të shmanget përhapja e virusit. Ne nuk i kemi ndalur lutjet, lutjet janë bërë për çdo qytetarë e besimtarë, par Zotit jemi falur sepse nuk kemi mundur ndoshta në institucionet fetare, por i kemi bërë në ato kushte që i kemi pasur.
Besoj se situata epidemiologjike do të shkojë duke u përmirësuar pas rezultateve dhe besojmë se shpejt do të mblidhemi në një konferencë kështu dhe të lajmërojmë për ndonjë mundësi që të hapen edhe xhamitë”, tha Ramadani.
